Türkiye dhe Iraku kanë nënshkruar një marrëveshje njëvjeçare që synon shfrytëzimin maksimal të Naftësjellësit të Naftës së Papërpunuar Irak–Türkiye, ndërsa dy vendet fqinje punojnë për arritjen e një marrëveshjeje afatgjatë që do të forcojë partneritetin e tyre energjetik.
Sipas Bayraktarit, marrëveshja u nënshkrua pas bisedimeve në Ankara mes tij dhe ministrit irakian të Naftës, Basim Mohammed Khudair.
Duke e njoftuar marrëveshjen në X, Bayraktar tha se ajo do të mundësojë përdorimin efikas të naftësjellësit ndërkufitar, ndërkohë që vazhdojnë negociatat për një marrëveshje gjithëpërfshirëse dhe afatgjatë.
“Ndërsa vazhdon puna jonë për një marrëveshje të re afatgjatë për këtë naftësjellës, i cili prej afro gjysmë shekulli shërben si një korridor strategjik energjetik mes vendeve tona, kemi vënë në zbatim këtë marrëveshje tranziti, e cila mbulon një kapacitet ditor prej 750 mijë fuçish”, tha ministri turk.
Më strategjik se kurrë
Naftësjellësi i Naftës së Papërpunuar Irak–Türkiye transporton naftën irakiane drejt terminalit të eksportit në Ceyhan, në bregdetin e Mesdheut, duke i mundësuar asaj qasje në tregjet ndërkombëtare.
Bayraktar e cilësoi këtë linjë gjithnjë e më të rëndësishme për sigurinë energjetike rajonale dhe globale, veçanërisht në kushtet e zhvillimeve të fundit në tregjet ndërkombëtare të naftës.
“Ky naftësjellës, i cili e dërgon naftën irakiane në tregjet botërore në mënyrë të sigurt dhe të pandërprerë përmes Ceyhanit, është bërë më strategjik se kurrë për sigurinë e furnizimit me energji në nivel rajonal dhe global”, tha ai.
Ministri turk shtoi se synimi i Ankarasë është të shfrytëzojë plotësisht kapacitetin e naftësjellësit dhe ta zgjerojë bashkëpunimin përtej eksportit të naftës së papërpunuar irakiane.
“Synimi ynë është të krijojmë një partneritet gjithëpërfshirës dhe afatgjatë, i cili jo vetëm do të transportojë naftën e Irakut, por edhe burimet energjetike të rajonit drejt tregjeve botërore përmes Ceyhanit, duke hapur një kapitull të ri në bashkëpunimin energjetik Türkiye–Irak”, deklaroi Bayraktar.
Marrëveshja vjen ndërsa Ankaraja dhe Bagdadi synojnë të thellojnë marrëdhëniet ekonomike dhe të forcojnë bashkëpunimin energjetik, me Ceyhanin që mbetet një portë kyçe për eksportin e naftës irakiane.
