Kryeministri i Hungarisë, Viktor Orban, të dielën pranoi humbjen në zgjedhje pas 16 vitesh në pushtet, me Partinë Tisza të opozitës, të udhëhequr nga Peter Magyar, që siguroi një fitore dërrmuese.
Viktor Orban lindi në vitin 1963 në një qytet rreth një orë në perëndim të Budapestit.
Ai ishte më i madhi nga tre djemtë në një familje ku babai i tij punonte si inxhinier bujqësor dhe ishte anëtar i Partisë Komuniste, ndërsa nëna e tij ishte mësuese e arsimit special.
Në jetën e tij të hershme kishte pak gjëra që sugjeronin se ai më vonë do të përballej me sistemin komunist të Hungarisë.
Ai ndoqi shkollën e mesme dhe mori pjesë në Lidhjen e Rinisë Komuniste.
Futbolli ishte pasioni i tij kryesor. Ai luajti për ekipin lokal, FC Felcsut, dhe ka mbetur thellësisht i përkushtuar ndaj këtij sporti që atëherë.
Në vitin 2014, ai hapi arenën e diskutueshme Pancho në vendlindjen e tij, ku tani luan klubi i ligës së parë Puskas Akademia, shpesh para turmave modeste.
Para se të fillonte universitetin, Orban kreu shërbimin ushtarak.
Ai ka thënë se gjatë kësaj kohe refuzoi një përpjekje të policisë sekrete komuniste për ta rekrutuar si informator.
Në moshën 23-vjeçare, ai u martua me studente si ai, Aniko Levai, të cilën e njohu në universitet.
Ata kanë pesë fëmijë, katër vajza dhe një djalë, Gaspar, i cili u trajnua në akademinë ushtarake Sandhurst në Britani dhe më vonë shërbeu si oficer në ushtrinë hungareze në Çad.
Menjëherë pas kësaj, Orban la studimet para kohe për të bërë fushatë në zgjedhjet e vitit 1990, në të cilat Fidesz fitoi 22 vende në parlament, me të në krye të listës së partisë.
Disa nga bashkëpunëtorët e tij të kohës së universitetit më vonë u bënë figura kyçe në Fidesz.
Drejtori i tij i mëparshëm në kolegj, Istvan Stumpf, më vonë shërbeu si shef i stafit gjatë mandatit të parë të Orbanit si kryeministër nga viti 1998 deri në 2002.
Si ligjvënës i ri, Orban e drejtoi Fideszin drejt lëvizjes Liberal International në vitin 1992.
Në vitin 1998, ai e çoi Fideszin drejt fitores zgjedhore dhe, në moshën 35-vjeçare, u bë kryeministri më i ri në Evropë.
Gjatë atij mandati, Hungaria iu bashkua NATO-s në vitin 1999.
Më pas ai humbi dy zgjedhje, në vitet 2002 dhe 2006, përvoja që formësuan strategjinë e tij të mëvonshme politike.
Orbani u rikthye në pushtet në vitin 2010, në mes të trazirave të krizës globale financiare, dhe ka qëndruar në detyrë që atëherë.
“Aleati më i afërt i Putinit brenda BE-së”
Orbani shpesh është përplasur me liderët e tjerë të BE-së për luftën në Ukrainë, përfshirë edhe duke bllokuar mbështetjen financiare kyçe për Kievin.
Ai e ka akuzuar Ukrainën se po përpiqet ta tërheqë Hungarinë në një konflikt me Rusinë.
Në të njëjtën kohë, ai gëzon mbështetje të fortë jashtë vendit.
Ai konsiderohet gjerësisht si “aleati më i afërt i presidentit rus Vladimir Putin brenda BE-së”, dhe presidenti amerikan Donald Trump mbështeti fushatën e tij për një mandat të pestë radhazi.
Trumpi ka thënë se do të përdorte fuqinë ekonomike amerikane për të përfituar Hungaria nëse Orban do të rizgjidhej, ndërsa nënpresidenti JD Vance vizitoi Budapestin pesë ditë para votimit dhe u bëri thirrje hungarezëve ta mbështesin Orbanin, duke thënë se ai përfaqëson interesat e tyre.
