Presidenti i Libanit, Joseph Aoun, ka shprehur shpresë për arritjen e një armëpushimi me Izraelin gjatë një takimi të planifikuar në Uashington.

Kjo deklaratë erdhi gjatë takimit të presidentit Aoun në Bejrut me ministrin italian të Punëve të Jashtme, Antonio Tajani, ku sipas presidencës libaneze, Aoun tha se pret që takimi i nesërm “të rezultojë në një armëpushim në Liban me synimin për të nisur negociata të drejtpërdrejta” mes dy vendeve.

“Tani ekziston një mundësi për të arritur një zgjidhje të qëndrueshme, që është ajo që dëshiron Libani. Megjithatë, kjo nuk mund të jetë një zgjidhje e njëanshme. Izraeli duhet t’u përgjigjet thirrjeve libaneze, arabe dhe ndërkombëtare për të ndalur sulmet ndaj Libanit dhe për të nisur negociata”, tha Aoun.

Presidenti libanez tha se luftërat e njëpasnjëshme të Izraelit kundër Libanit “kanë dështuar të arrijnë objektivat e tyre që nga viti 1982”.

“Shkatërrimi i territorit libanez nga Izraeli dhe shënjestrimi i institucioneve publike dhe private nuk është zgjidhje. Zgjidhjet diplomatike kanë qenë gjithmonë mënyra më e mirë për të zgjidhur konfliktet e armatosura në mbarë botën”, shtoi ai.

Të dërguarit e qeverive të Libanit dhe Izraelit nesër pritet të takohen në Uashington për bisedime që synojnë sigurimin e një armëpushimi dhe nisjen e negociatave të drejtpërdrejta.

Ushtria izraelite ka zgjeruar ofensivën e saj ajrore dhe tokësore në të gjithë Libanin që nga një sulm ndërkufitar nga Hezbollahu më 2 mars, pavarësisht një marrëveshjeje armëpushimi që hyri në fuqi në nëntor 2024.

Sipas autoriteteve shëndetësore libaneze, të paktën 2.089 persona janë vrarë dhe 6.762 të tjerë janë plagosur që nga fillimi i sulmeve izraelite.

Izraeli mban të pushtuara zona në jug të Libanit, disa prej dekadash dhe të tjera që nga konflikti i mëparshëm midis tetorit 2023 dhe nëntorit të vitit pasues.