Kryeministri britanik, Keir Starmer tha të hënën se Mbretëria e Bashkuar "nuk mbështet bllokadën" e porteve iraniane, duke theksuar se përparësia e qeverisë është rihapja e Ngushticës së Hormuzit për të ulur çmimet e energjisë.

"Përgjigja jonë është e përqendruar në hapjen e Ngushticës së Hormuzit sepse kjo është mënyra sesi i ulim çmimet e energjisë sa më shpejt të jetë e mundur", tha Starmer për BBC Radio 5.

Kur u pyet nëse e mban Presidentin e ShBA-së, Donald Trump, personalisht përgjegjës për ndikimin në faturat e energjisë në Mbretërinë e Bashkuar, Starmer nuk u përgjigj drejtpërdrejt, duke thënë në vend të kësaj se “gjëja më e rëndësishme” që ai mund të bëjë është të bashkojë vendet për të nxitur uljen e tensioneve dhe rihapjen e ngushticës.

Ai shtoi se Irani është përgjegjës për kufizimin e trafikut përmes Gjirit dhe tha se Mbretëria e Bashkuar "nuk po përfshihet në luftë".

Presidenti i ShBA-së, Donald Trump, njoftoi një bllokadë ndaj porteve iraniane që do të hyjë në fuqi në orën 14:00 të hënën.

Njoftimi i bllokadës detare amerikane erdhi pasi Uashingtoni dhe Teherani zhvilluan bisedime të rralla të drejtpërdrejta në kryeqytetin pakistanez Islamabad gjatë fundjavës për t'i dhënë fund luftës që filloi më 28 shkurt, ndërsa bisedimet dështuan të prodhonin një marrëveshje.