Türkiye ka hedhur poshtë pretendimet se zyrtarë të qeverisë siriane dhe përfaqësues të Hezbollahut janë takuar në Türkiye nën ndërmjetësimin e Organizatës Kombëtare të Inteligjencës (MIT), duke i cilësuar raportimet si të fabrikuara.

Në një deklaratë të enjten, Qendra për Luftimin e Dezinformimit pranë Drejtorisë së Komunikimeve tha se pretendimet sipas të cilave “zyrtarë të qeverisë siriane dhe zyrtarë të Hezbollahut janë takuar në Türkiye, me mikpritjen e Organizatës Kombëtare të Inteligjencës (MIT)” janë plotësisht të pabazuara.

Qendra tha se pretendimet lidhur me datën, vendin, përmbajtjen dhe pjesëmarrësit e takimit të supozuar “nuk pasqyrojnë asnjë realitet dhe janë tërësisht të fabrikuara dhe spekulative”.

Ajo i bëri thirrje publikut që t’u referohet vetëm deklaratave të lëshuara nga autoritetet zyrtare dhe paralajmëroi kundër pretendimeve që qarkullojnë përmes kanaleve jozyrtare.

Edhe qeveria siriane mohoi se një takim i tillë kishte ndodhur.

“Këto pretendime janë të rreme dhe asnjë takim i tillë nuk ka ndodhur”, tha Drejtoria për Mediat e Huaja të Ministrisë siriane të Informacionit, sipas televizionit shtetëror Alikhbariah TV.