Liderët e Bashkimit Evropian deklaruan të mërkurën se “kërcënimet” e fundit të Rusisë ndaj shteteve baltike janë “plotësisht të papranueshme”, duke paralajmëruar se çdo intimidim ndaj një shteti anëtar të BE-së do të përballet me një përgjigje të bashkuar nga blloku.

“Kërcënimet publike të Rusisë ndaj shteteve tona baltike janë plotësisht të papranueshme. Të mos ketë asnjë dyshim. Një kërcënim ndaj një shteti anëtar është kërcënim ndaj gjithë Bashkimit tonë”, shkroi presidentja e Komisionit Evropian, Ursula von der Leyen, në X.

Ajo akuzoi Rusinë dhe Bjellorusinë se mbajnë “përgjegjësi të drejtpërdrejtë” për incidentet me dronë që rrezikojnë sigurinë në krahun lindor të Evropës.

Von der Leyen tha se BE-ja do të vazhdojë të forcojë sigurinë dhe gatishmërinë përgjatë kufijve lindorë përmes “mbrojtjes së fortë kolektive”.

Duke iu bashkuar kritikave të von der Leyenit, presidenti i Këshillit Evropian, Antonio Costa, i përshkroi veprimet e Rusisë si pjesë të një strategjie më të gjerë të “luftës hibride”.

“Kërcënimet dhe provokimet e vazhdueshme të Rusisë ndaj shteteve baltike janë të papranueshme. Ato janë pjesë e taktikave hibride të luftës së Rusisë dhe përbëjnë kërcënim për Bashkimin Evropian në tërësi”, shkroi ai në X.

Costa tha se BE-ja do të përshpejtojë përpjekjet për të forcuar kapacitetet mbrojtëse dhe për të rritur presionin ndaj Moskës.

Komentet erdhën pasi zëdhënësi i Kremlinit, Dmitry Peskov, deklaroi se ushtria ruse po përgatit një përgjigje “të përshtatshme” ndaj pretendimeve të Moskës se Ukraina po e përdor territorin e shteteve baltike për të nisur sulme me dronë kundër Rusisë.

Paralajmërimi pasoi deklaratat e Shërbimit të Inteligjencës së Jashtme të Rusisë (SVR), i cili akuzoi Letoninë se po lejon Ukrainën të nisë sulme me dronë nga territori i saj dhe paralajmëroi se anëtarësimi në NATO nuk do ta “mbrojë” atë nga hakmarrja ruse.

Letonia i hodhi poshtë akuzat, ndërsa ministri i Jashtëm i vendit akuzoi Moskën për zhvillim të një fushate dezinformimi.

Ndërkohë, sekretari i përgjithshëm i NATO-s, Mark Rutte, i cilësoi pretendimet e Rusisë ndaj Letonisë si “qesharake”.