Trajneri i Manchester Cityt, Enzo Maresca këmbënguli se titujt e klubit të futbollit “absolutisht nuk” janë njollosur, pasi një komision i pavarur e shpalli atë fajtor për shkeljen e rregullave financiare të Premierligës angleze.

Duke folur para ndeshjes së të dielës, kur City do të luajë në transfertë kundër Liverpoolit, Maresca tha se e di “saktësisht përpjekjen që ka bërë klubi” për t’i fituar trofetë dhe shprehu besimin e tij te pronarët dhe drejtuesit e lartë të klubit.

“Arsyeja pse iu bashkova këtij klubi është se kam besim të plotë, 100 për qind, te pronari, drejtori ekzekutiv, drejtori sportiv dhe e gjithë organizata. Prandaj, nuk kam dyshime për këtë”, tha ai në një konferencë për media.

Komisioni e shpalli Cityn fajtor për shkelje që përfshijnë sezonet nga 2009–2010 deri në 2017–2018, përfshirë përdorimin e kontratave tregtare “fiktive” dhe paraqitjen e pasqyrave financiare çorientuese, në kuadër të një skeme të dyshuar për të fshehur më shumë se 830 milionë paundë financime.

City i ka mohuar shkeljet dhe ka paraqitur ankesë, duke argumentuar se vendimi përmban “gabime të qarta thelbësore ligjore, parimore dhe faktike” dhe se nuk është i qëndrueshëm.

Maresca tha se e ka diskutuar vendimin me klubin, por sugjeroi se komentet e mëtejshme duhet të presin deri në përfundimin e procesit të apelit. “Ne të gjithë kemi besim dhe ndoshta momenti i duhur për të folur për këtë është kur ta fitojmë këtë apel”, tha ai.

Trajneri italian shtoi se lojtarët e tij do të përqendrohen te gjërat që mund të ndikojnë. “Për mua dhe lojtarët, ne mund të kontrollojmë vetëm atë që ndodh në fushë, aspektin futbollistik. Prandaj, jemi të përqendruar te kjo. Kjo është ajo që mund të bëjmë dhe kontrollojmë”, tha ai.

Maresca, i emëruar në qershor si pasardhës i Pep Guardiolës, më parë ka punuar me akademinë e Cityt dhe ka qenë ndihmës i Guardiolës gjatë sezonit 2022–2023, kur klubi fitoi tripletën. City i ka fituar të pesë ndeshjet e para në Premierligës nën drejtimin e 46-vjeçarit. Një fitore në stadiumin Anfield do ta bënte Marescan trajnerin e katërt që fiton gjashtë ndeshjet e para në krye të një klubi në këtë garë.

Ai pranoi se vendimi për çështjen financiare mund të krijojë atmosferë edhe më armiqësore se zakonisht të dielën. “Me gjasë, atmosfera do të jetë edhe më e keqe për shkak të kësaj situate, por, sërish, detyra jonë është të bëjmë më të mirën dhe të përpiqemi ta fitojmë ndeshjen”, tha ai.

“Arsyeja pse vendosa të bëhem trajner është pikërisht për ndeshje të tilla", shtoi trajneri. Maresca konfirmoi gjithashtu se sulmuesi Erling Haaland është gati të përballet me Liverpoolin pas pushimit për ndeshjet e kombëtareve.