Ndihmat humanitare turke për Libanin do të vazhdojë ndërsa zhvendosja përkeqësohet për shkak të sulmeve izraelite, thanë të hënën zyrtarët libanezë dhe turq.

Komentet u bënë gjatë një ceremonie për të dorëzuar 360 tonë ndihma në portin e Bejrutit, ku morën pjesë zyrtarë libanezë dhe turq, përfshirë Samir Hadara, përfaqësues i zëvendëskryeministrit libanez, Tarek Mitri; ministrit të Zhvillimit, Fadi Makki; ministrit të Punëve Publike Fayez Rasamny dhe kreut të Komitetit të Shëndetësisë, Bilal Abdullah.

Gjithashtu morën pjesë sekretari i përgjithshëm i Komisionit të Lartë të Ndihmës, Bassam Nabulsi, ambasadori turk në Liban, Murat Lutem dhe kreu i Shoqatës Turke të Gurit të Bamirësisë (Sadaka Tasi), Kemal Özdal.

“Mbështetja turke vjen në një kohë vendimtare dhe pasqyron solidaritet të vërtetë me Libanin në përballjen me sfidat aktuale”, tha Makki gjatë ceremonisë.

“Kjo mbështetje nuk kufizohet vetëm në aspektin humanitar, por përfshin edhe një qëndrim politik që mbështet Libanin në dënimin e sulmeve izraelite”, shtoi ai.

Lidhur me ndihmat turke, Makki tha se përfshinin “furnizime jetësore, veçanërisht tenda, për të ndihmuar në sigurimin e qëndrueshmërisë së banorëve në fshatrat përgjatë kufirit jugor”. Ai shprehu shpresën “se këto përpjekje, së bashku me mbështetjen nga vendet mike, do t’i ndihmojnë personat e zhvendosur të kthehen në fshatrat e tyre me dinjitet”.

Më shumë se 1 milion njerëz janë zhvendosur në Liban për shkak të sulmeve izraelite ndërsa disa kanë filluar të kthehen në shtëpi pasi një armëpushim hyri në fuqi mes shkatërrimeve të përhapura.

• Kushtet në përkeqësim

Ambasadori turk theksoi miqësinë e thellë midis popullit libanez dhe atij turk. “Türkiye do të qëndrojë gjithmonë pranë Libanit dhe popullit të tij miqësor. Türkiye ka qëndruar vazhdimisht pranë Libanit përmes institucioneve të saj zyrtare dhe organizatave joqeveritare”, tha Lutemi për Anadolu.

“Sulmet izraelite që nga viti 2024 kanë shkaktuar vuajtje të konsiderueshme dhe zhvendosje në shkallë të gjerë, dhe që atëherë Türkiye ka ofruar më shumë se 1.700 tonë ndihmë humanitare”, shtoi ai.

Diplomati tha se ndihma pasqyron “bujarinë dhe solidaritetin e popullit turk”. Lidhur me dërgesën aktuale, Lutemi tha se ajo përbëhet nga tre grupe, ku e para mbërrin në fillim të prillit, e dyta dorëzohet të hënën dhe e treta pritet së shpejti.

“Më shumë se 1 milion libanezë janë zhvendosur nga shtëpitë e tyre, duke përfaqësuar rreth një të pestën e popullsisë, mes shkeljeve të vazhdueshme të armëpushimit, duke e bërë nevojën për ndihma jashtëzakonisht urgjente”.

• Shpërndarje e drejtë

• Kreu i Komitetit të Shëndetësisë, Bilal Abdullah tha se mbështetja turke “nuk është e re, por vjen brenda një politike të bazuar në arsye, mençuri dhe solidaritet”, duke lavdëruar vazhdimësinë e ndihmës që nga viti 2024.

“Këto përpjekje kanë lënë ndikim të rëndësishëm në ndërgjegjen e popullit libanez”, tha ai për Anadolu, duke shprehur mirënjohje për Türkiye dhe institucionet e saj. “Shpresojmë t’ia shpërblejmë Türkiye, udhëheqjes dhe popullit të saj, në rrethana më të mira dhe më të lumtura se ato që po përjeton Libani sot”, shtoi ai.

Ai tha se shpërndarja e ndihmës bëhet “përmes një mekanizmi qendror nëpërmjet guvernatorëve, duke marrë parasysh numrin e të zhvendosurve në secilën zonë për të siguruar drejtësi”.

Kreu i Shoqatës Turke të “Gurit të Bamirësisë”, Kemal Özdal tha se Türkiye vazhdon të mbështesë Libanin gjatë rrethanave të tij të vështira.

“Lidhjet midis popujve nuk maten me fjalë, por me veprime të sinqerta”, tha ai.