Në sulmet izraelite në Rripin e Gazës, herët të enjten, u vranë edhe tre palestinezë të tjerë, mes tyre dy fëmijë, ndërsa të paktën 21 persona mbetën të lënduar, shumica prej të cilëve fëmijë.

Sulmet u kryen pavarësisht shkeljeve të vazhdueshme izraelite të marrëveshjes së armëpushimit, në fuqi në këtë enklavë që nga 10 tetori 2025.

Në jug të Rripit të Gazës, në Khan Younis, në një sulm izraelit ndaj një vendbanimi me tenda të personave të zhvendosur, në zonën e Al-Mawasit, në perëndim të qytetit, u vranë njëzetvjeçari Abdullah Nasser al-Balaawi dhe tetëvjeçarja Ratel Mahmoud Abdullah, ndërsa u lënduan pesë persona, mes tyre edhe fëmijë, njoftoi një burim mjekësor nga spitali Nasser.

Dëshmitarë okularë thanë për Anadolu se një raketë e lëshuar nga një helikopter izraelit goditi një tendë ku flinin palestinezë të zhvendosur, në afërsi të zonës së Kolegjit të Aplikuar në Al-Mawasi. Në sulm humbën jetën dy persona, ndërsa pesë të tjerë u lënduan.

Ndërkohë, ushtria izraelite bombardoi me artileri zonat në jug të Khan Younisit, ndërsa automjete ushtarake hapën zjarr të fuqishëm drejt Al-Mawasit, në verilindje të Rafah. Nuk ka raportime për viktima nga këto sulme.

Në kampin e refugjatëve Bureij, në pjesën qendrore të Gazës, humbi jetën fëmija Zaid Mohammed Nofal, ndërsa katër palestinezë u lënduan në një sulm ndaj një apartamenti përballë ndërtesës së bashkisë, tha për Anadolu një burim mjekësor nga spitali Shuhadaa Al-Aqsa.

Në Qytetin e Gazës, 13 palestinezë, shumica fëmijë, pësuan lëndime të rënda në një sulm ajror ndaj një apartamenti në ndërtesën Al-Bassam, pranë shkollës Salah al-Din, në lagjen Al-Nasr, në perëndim të qytetit, sipas një burimi mjekësor nga spitali Al-Shifa.

Dëshmitarë okularë thanë se pas sulmit shpërtheu një zjarr në apartament, të cilin e shuan vullnetarë vendas dhe ekipet e mbrojtjes civile.

Artileria izraelite gjithashtu bombardoi me forcë zonat në lindje të lagjes Al-Tuffah, në pjesën lindore të Qytetit të Gazës, ndërsa automjetet ushtarake të vendosura në lindje të të ashtuquajturës "vijë e verdhë" qëlluan intensivisht.

Pavarësisht armëpushimit që hyri në fuqi më 10 tetor 2025, Izraeli ka vazhduar sulmet e përditshme në të gjithë Gazën, ku deri më tani janë vrarë 1.209 palestinezë dhe janë lënduar 3.943 të tjerë, shumica gra dhe fëmijë, përveç shkatërrimeve të mëdha.

Me mbështetjen e Shteteve të Bashkuara të Amerikës, Izraeli nisi luftën në Gaza më 8 tetor 2023, në të cilën janë vrarë mbi 73.000 palestinezë dhe janë lënduar mbi 174.000 të tjerë, shumica gra dhe fëmijë. Sulmet kanë shkatërruar rreth 90 për qind të infrastrukturës së Rripit të Gazës.