Ministri i Jashtëm i Türkiye, Hakan Fidan mbërriti sot në Indonezi si pjesë e turneut të tij në Azi-Paqësor.

Fidan u prit nga homologu i tij indonezian Sugiono në kryeqytetin Xhakarta.

Gjatë bisedimeve të tij me zyrtarë të lartë, Fidan do të diskutojë për zgjerimin e bashkëpunimit dypalësh midis dy vendeve, forcimin e lidhjeve tregtare dhe të mbrojtjes si dhe adresimin e sfidave rajonale dhe globale të sigurisë.

Sugiono tha se është "gjithmonë kënaqësi" të mirëpresë Fidanin në Xhakarta.

"Indonezia dhe Türkiye janë dy kombe që qëndrojnë së bashku kur ka rëndësi dhe Indonezia e vlerëson thellësisht mbështetjen dhe solidaritetin e palëkundur të Türkiyes, në mbrojtjen e parimeve tona të përbashkëta", shkroi ai në platformën sociale X.

Türkiye është një nga vendet e para që ka njohur pavarësinë e Indonezisë. Marrëdhëniet diplomatike u vendosën në vitin 1950 ndërsa Ambasada Turke në Xhakarta u hap në vitin 1957.

Këshilli i Bashkëpunimit Strategjik të Nivelit të Lartë midis Türkiyes dhe Indonezisë u krijua në vitin 2022 gjatë vizitës së presidentit turk Recep Tayyip Erdoğan në Bali me rastin e Samitit të liderëve të G-20.