Канада има намера да го објави основањето на Светската банка за одбрана, безбедност и отпорност следната недела на самитот на НАТО во Туркије, заедно со околу десет земји, чија цел е да обезбеди околу 117 милијарди евра поволно финансирање за зајакнување на одбранбените капацитети на сојузничките земји, изјави денес главната канадска преговарачка за иницијативата, Изабел Удон.

„Го поставивме самитот на НАТО како краен рок. Целта ни е тогаш да го објавиме списокот на земјите основачи“, изјави Удон, која ги води преговорите за започнување на оваа мултилатерална иницијатива, а воедно е и извршен директор на Канадската банка за развој на бизнисот, во интервју за Ројтерс.

Според неа, банката треба да собере околу 117 милијарди евра поволен капитал наменет за зајакнување на одбранбените капацитети на сојузничките земји.

Удон изјави дека меѓу првите земји основачи, освен Канада, најверојатно ќе има исклучиво европски земји, но не сакаше да открие кои земји се тоа.

Таа предупреди дека конечното соопштение сè уште не е сигурно, бидејќи зависи од конечните преговори со сојузниците, вклучително и договорот за нивните финансиски удели во капиталот на идната банка, но оцени дека проектот добива сè поголема поддршка.

„Премиерот (на Канада Марк Карни) рече дека не треба да се стремиме кон совршенство пред да ја започнеме оваа иницијатива, туку да ги собереме земјите што се подготвени да бидат основачи, додека членството ќе остане отворено и за други“, рече Удон.

Сепак, судбината на проектот е сè уште неизвесна без поддршката на државите, чие учество би било клучно за добивање на највисок кредитен рејтинг „ААА“.

Удон изјави дека разговорите со Јужна Кореја биле конструктивни и дека постои еднаква шанса таа земја да се приклучи на проектот, веројатно во подоцнежна фаза.

Таа додаде дека засега, ниту еден друг член на Групата седум најразвиени економии во светот (Г7) не е блиску до донесување одлука за пристапување.

Канадскиот премиер Марк Карни го промовира основањето на Банката за одбрана, безбедност и отпорност (DSRB) како дел од неговата иницијатива за создавање сојуз на „средни сили“ што би одговорил на она што тој го смета за сè поизразено слабеење на традиционалниот светски поредок предводен од Соединетите Американски Држави.