Европската комисија потпиша договор за имплементација со конзорциумот „Спејс Рајз“ за забрзување на распоредувањето на безбедната сателитска констелација ИРИС 2 на Европската Унија, со што планираната мрежа ќе се прошири од 282 на 348 сателити.

Договорот ги завршува преговорите започнати во јануари 2026 година и ја преместува водечката вселенска програма на ЕУ од фаза на планирање во целосно распоредување, со првите лансирања на сателити закажани за 2029 година.

Според ревидираниот план, констелацијата ќе вклучува 330 сателити во ниска Земјина орбита и 18 во средна Земјина орбита, заедно со опционални елементи дизајнирани да поддржат специфични мисии.

Од ЕУ соопштија дека проширениот систем вклучува дополнителен слој од 66 сателити за зајакнување на одбранбените, безбедносните и капацитетите за реагирање во вонредни ситуации во светлината на еволутивната безбедносна средина.

Според Европската комисијата, засилувањето ќе го зголеми капацитетот на безбедните владини комуникации за 60% во рамките на ЕУ и за 54% на глобално ниво, а воедно ќе ја подобри способноста на Европа да поддржува критични операции за време на кризи.

Откако ќе биде оперативен, ИРИС 2 ќе обезбеди безбедни и отпорни комуникациски услуги за владите на ЕУ, одбранбените и безбедносните власти и службите за итни случаи низ цела Европа.

Мрежата ќе ги опслужува и земјите учеснички, вклучувајќи ги Норвешка и Исланд.

Блокот соопшти дека забрзаното распоредување и проширениот капацитет ќе бараат дополнително финансирање од буџетот на ЕУ за периодот 2028-2034 година, како и придонеси од земјите-членки и третите земји учеснички.

Полска издвои 656 милиони евра за проектот, Унгарија издвои 500 милиони, додека Шпанија најави планирани инвестиции помеѓу 1,6 и 2 милијарди евра.

Дополнителни национални придонеси се во фаза на дискусија.