Египетскиот фудбалер Мохамед Салах ќе ги напушти редовите на Ливерпул по завршувањето на оваа сезона, објави актуелниот англиски шампион.

„Салах ја изрази својата желба што поскоро да им обезбеди транспарентност на своите фанови за неговата иднина од почит и благодарност кон нив, се наведува во клупското соопштение.

Триесетитригодишниот египетски напаѓач ја потврди информацијата во видеопорака на социјалните мрежи.

„За жал, дојде денот. Го напуштам Ливерпул на крајот од сезоната. Ливерпул не е само фудбалски клуб. Тоа е страст, тоа е историја, тоа е дух што не можам да го објаснам со зборови на никого кој не е дел од овој клуб, Заедно ги прославувавме победите, ги освоивме најважните трофеи и заедно се боревме низ најтешкиот период од нашите животи. Заминувањето никогаш не е лесно. Ми го дадовте најубавото време во мојот живот. Секогаш ќе бидам еден од вас. Поради сите вас, никогаш нема да одам сам“, порача Салах.

Салах му се приклучи на Ливерпул од Рома во летото 2017 година и оттогаш се етаблираше како еден од најдобрите напаѓачи во историјата на клубот.

Со 255 голови на 435 натпревари, Египќанецот е трет на листата најдобри стрелци на Ливерпул на сите времиња, зад Ијан Раш (346) и Роџер Хант (285).

Салах со Ливерпул освои осум трофеи – две титули во Премиер лигата, Лигата на шампиони, Светското клупско првенство на ФИФА, Суперкупот на УЕФА, ФА Купот, Лига Купот и ФА Комјунити Шилд.