Началникот на Генералштабот на израелската армија Ејал Замир предупреди дека би можеле да се соочат со внатрешен колапс доколку Владата не го реши проблемот со недостигот на војници.

„Подигнувам 10 црвени знамиња пред ИДФ и сами ќе колабрираат“, изјави Замир на состанокот на Кабинетот за безбедност

Воени извори изразија „огромна загриженост“ поради недостигот, особено во услови на тековната војна, истакнувајќи дека дури и во мирно време ќе бидат потребни повеќе војници на повеќе фронтови, вклучително Газа, Либан, Сирија и Западниот Брег.

Официјални лица предупредија дека без дополнителен персонал „ќе се појават големи празнини“ во оперативната покриеност.

Недостигот делумно се припишува на отсуството на закон со кој значително би се проширила регрутацијата меѓу харедите, односно еврејската ултраортодоксна популација.

Предлог-законот за зголемување на регрутирањето на харедите беше „ставен настрана“ од премиерот Бенјамин Нетанјаху во име на единството на владината коалиција за време на војната.

Опозициските претставници упатија остри критики до Владата по изјавите на Замир, предупредувајќи на пошироки безбедносни ризици.

Членовите на партијата Јеш Атид го опишаа закочениот процес на регрутација како „безбедносна опасност“, додавајќи дека „повеќе не е можно ова да се игнорира“.

„При следната катастрофа Владата не ќе може да каже - не знаевме“, порача опозицискиот лидер Јаир Лапид.

Лидерот на партијата Израел Бејтену, Авигдор Либерман, повика на универзална регрутација, додека поранешниот премиер Нафтали Бенет праша: „Во име божјо, што чекате?“

Поранешниот началник на војската, Гади Ајзенкот, изјави дека задолжителниот воен рок за сите е „потреба на моментот“, додека други политички претставници предупредија дека потпирањето врз резервистите достигнува неодржливо ниво.