Претседателот на САД, Доналд Трамп, ѝ се закани на Европската Унија со дополнителни тарифи доколку блокот дозволи Канада да стане придружен член.

Претседателката на Европската комисија, Урсула фон дер Лајен, во среда изјави дека Канада треба да стане првата придружена членка на ЕУ, иако таков статус моментално не постои.

Трамп рече дека таквата идеја може да се смета за непријателски чин и се закани дека ќе воведе тарифи на ЕУ како одговор.

„Ако намерите се добри, во ред. Ако се лоши, ќе ѝ воведеме многу високи тарифи на Европа“.

Тој додаде дека САД би можеле да ја суспендираат трговијата со Европа во одредени области.

Трамп ја нарече можноста Канада да се приклучи на ЕУ смешна и тврдеше дека Канада била ужасен трговски партнер.

Канадскиот премиер, Марк Карни, го поздрави предлогот на ЕУ за многу посилен и поамбициозен сојуз во иднина, се вели во соопштението на неговата канцеларија, без директно да го спомене придружното членство.

Карни претходно оваа недела изјави дека неговата земја сака да изгради уникатен сојуз со ЕУ.

Сепак, статусот на придружен член моментално не постои според договорите на ЕУ. Карни се стреми да ги продлабочи односите со ЕУ, вториот најголем трговски партнер на Канада, откако трговските односи со САД, најголемиот економски партнер на Отава, значително се влошија под водство на Трамп.