Роверот „Персеверанс“ на НАСА постави нов рекорд за најдолго растојание поминато од возило на друга планета, надминувајќи го претходниот рекорд што го држеше роверот „Опортјунити“.

„Персеверанс“ помина вкупно растојание од 45,2 километри на Марс, надминувајќи го рекордот на „Опортјунити“ од 45,16 километри поставен за време 15-годишната мисија од 2004 до 2018 година.

Роверот стигна до пресвртната точка додека го истражуваше западниот раб на кратерот „Језеро“, каде што научниците бараат докази за древни хидротермални системи и можни знаци на минат микробен живот.

„Персеверанс“ слета на Марс во февруари 2021 година и оттогаш им помогна на научниците да ја реконструираат историјата на кратерот Језеро, кој некогаш содржел вода. НАСА во 2023 година изјави дека областа можеби поддржувала микробен живот пред милијарди години.

Роверот го помина растојанието релативно брзо благодарение на својот автономен навигациски систем, „АвтоНав“, кој му овозможува да анализира слики од теренот, да идентификува опасности и да планира рути додека вози.

Роверот може да патува до 412 метри (1.351 стапки) во текот на еден марсовски ден, или сол.

НАСА ја продолжи мисијата на роверот до крајот на 2028 година, дозволувајќи му да продолжи да го истражува работ на кратерот и потенцијално да го зголеми рекордот во возењето.