Претседателот на САД, Доналд Трамп, изјави дека Соединетите Американски Држави не го напаѓаат Иран „со полн капацитет“ поради меѓуизборите на 3 ноември, предвидувајќи дека војната ќе заврши по изборите или можеби дури и пред тоа, пренесува Анадолу.

На прашањето во интервјуто за „Фокс њуз“ за повиците САД да „тргнат со полн капацитет“ во војната против Иран, Трамп се повика на претстојните меѓуизбори, кои се одржуваат на средина на претседателскиот мандат.

„Па, може не го правам тоа поради изборите“, рече тој.

Трамп го повтори своето предвидување дека војната ќе заврши кратко по изборите, но напомена дека би можела да заврши и пред тоа.

„Тие едвај опстојуваат. Во големи неволји се“, рече американскиот претседател.

Кога беше прашан како Иранците сè уште доаѓаат до ракети ако САД ги уништиле нивните капацитети, Трамп одговори нагласувајќи дека Иранците секогаш може да лансираат ракети.

„Имаа многу, а и сега имаат одредена количина. Во голема мера се уништени... Но имаат ракети. Секогаш ќе имаат некои ракети“, рече тој.

Трамп, исто така, изјави дека не жали за тоа како се одвива војната со Иран, истакнувајќи дека не верува во зборот „каење“.

„Ако требаше да го направам тоа повторно, ќе постапев точно како што постапив“, додаде тој.

Трамп рече дека ги елиминирал нуклеарните капацитети на Иранците и тврдеше дека тие би ги искористиле.

„Тие се луди... Би го уништиле Израел. Би го уништиле Блискиот Исток и би почнале да напаѓаат неколку наши градови“, рече американскиот претседател.

„Ако Иран имаше нуклеарно оружје, ние ќе се јавевме и ќе прашавме: ’Господине, може ли евентуално да се сретнеме?‘ Сосема поинаку ќе постапувавме со нив“, додаде тој.

Подоцна истиот ден, враќајќи се од републиканската конвенција за меѓуизборите во Далас, Тексас, Трамп ги отфрли наводите на „Волстрит џурнал“ со кој се укажува дека војната со Иран би можела да трае до крајот на неговиот мандат.

„Тоа е еден од најнеточните весници што некогаш сум ги читал... Нема ни најмала шанса за такво нешто“, им рече тој на новинарите.

На прашањето за растот на цените на нафтата, Трамп истакна дека цените ќе се „вратат на претходното ниво“ штом ќе ја „добијат“ војната. „Кога тоа ќе заврши – а мислам дека ќе заврши многу брзо по изборите; може да заврши и пред изборите, но мислам дека ќе заврши многу набрзо по изборите...“, рече тој.