Неколку лица загинаа и има повредени откако вчера туристички автобус доживеа несреќа во Источна Швајцарија, соопшти полицијата.

Полицијата на кантонот Граубинден првично ја пријави несреќата околу 18:30 часот по локално време, наведувајќи дека туристички автобус излетал од патот меѓу општините Суш и Цернец и дека на терен се пратени екипи на итните служби.

Подоцна полицијата преку објава на американската платформа на социјални мрежи X потврди дека „неколку лица“ загинале, а неколкумина се повредени. Надлежните органи веднаш не ги соопштија точниот број на жртви ниту деталите за причините за несреќата.

Според швајцарскиот весник „Блик“, кој се повикува на портпарол на АНВР (организација-претставник на холандската туристичка индустрија), автобусот му припаѓал на туристички оператор од Холандија и превезувал група од 48 лица.

Според наводите, повеќето од патниците биле холандски државјани.

Групата го започнала патувањето во понеделникот, но почетната точка и дестинацијата не се познати.

Полицијата отвори телефонска линија за роднините и конзулатите што бараат информации за несреќата.