Ископувањата во античкиот град Родијаполис, кој се наоѓа во округот Кумлуча во провинцијата Анталија, во јужна Туркије, се очекува да продолжат следната година, по период на прекин.

Гувернерот на округот Кумлуча, Бахадир Ѓунеш, го посети археолошкиот локалитет со делегација и рече дека Родијаполис претставува „прозорец кон историјата“ за округот.

Голем дел од античкиот град веќе е откриен во рамки на претходните ископувања, рече Ѓунеш, оценувајќи дека планираното продолжување на работите е од големо значење.

Бесте Томај, археолог од Универзитетот во Адијаман, која е советник на проектот за ископување, рече дека Родијаполис зазема значајно место меѓу античките градови на Ликија, историски регион кој опфаќал делови од денешна југозападна Туркије.

Томај рече дека годинава се спроведуваат подготвителни активности, вклучително и теренски истражувања, преглед на претходните ископувања и попис на артефактите и материјалите што се чуваат во депоата.

„Од следната година ќе ги продолжиме ископувањата под координација на дирекцијата за ископувања“, рече таа.

На локалитетот се наоѓаат остатоци од ликискиот и византискиот период, меѓу кои театар, бањи, агора, храмови, црква, цистерни и монументални гробници, рече Томај.

Таа додаде дека целосното откривање на античкиот град би претставувало значаен придонес за историското и културното наследство на Кумлуча.