Директорот на Дирекцијата за заштита и спасување (ДЗС), Стојанче Ангелов, учествуваше на Конференцијата за управување со катастрофи во рамките на Балканската платформа за мир, иницијатива предводена од Република Туркије, на покана на претседател на Претседателството за управување со катастрофи и вонредни состојби (АФАД) на Република Туркије, Али Хамза Пехливан, во Анкара.

„Истата беше организирана и насочена кон поттикнување на регионалниот дијалог, политичката стабилност, економскиот просперитет и директната комуникација меѓу балканските држави. Конференцијата, поддржана од турскиот претседател Ердоган, го стави во фокус управувањето со природните катастрофи како значајна област за унапредување на регионалната соработка, зајакнување на подготвеноста и градење стабилен и отпорен регион на главниот ден од настанот, 15 октомври 2026“, соопштија од ДЗС.

Инаку, на настанот со повеќедневна агенда, учествуваа претставници од земјава, Црна Гора, Србија, Босна и Херцеговина, Албанија и Косово. Преку презентации на националните системи, актуелните состојби и стекнатите искуства, учесниците ја истакнаа важноста на координираниот регионален пристап, размената на знаења и добри практики, како и зајакнувањето на партнерството во справувањето со заедничките ризици од катастрофи.

Во рамките на овој настан беше реализирана и посета на провинцијата Газиантеп, најпогодена од разорниот земјотрес, што се случи на 6 февруари 2023 година. По тој повод, беше остварена средба со окружниот гувернер на Нурдаги, Нуралах Џемил Ерчијас, кој ги претстави активностите за обнова и овозможи посета на новоизградените станбени објекти наменети за граѓаните кои ги загубиле своите домови во земјотресот. Посетата овозможи непосреден увид во обемот на вложените напори за надминување на последиците од катастрофата, обезбедување соодветни услови за живот и создавање побезбедни и поотпорни заедници

„Учеството на Конференцијата ја потврди важноста на регионалната солидарност и соработката во областа на управувањето со катастрофи: катастрофите не познаваат граници, континуираното унапредување на националните капацитети, споделувањето на искуствата и координираното дејствување се од суштинско значење за поефикасна превенција, подготвеност и одговор, како и за изградба на побезбеден и поотпорен Регион“, велат од ДЗС.