Турскиот институт за статистика (ТУИК) и Државниот завод за статистика на Република Северна Македонија постигнаа договор за унапредување на соработката во областа на статистиката.

Според соопштение на ТУИК, претседателот на институцијата, Мехмет Арабачи, учествувал на 111. Конференција на претседателите на националните статистички институции на Европа, која се одржа во Берн, Швајцарија.

Конференцијата, која секоја година се организира во рамките на Европскиот статистички систем, под покровителство на националната статистичка институција на различна земја, оваа година беше организирана од Федералната канцеларија за статистика на Швајцарија, во соработка со Статистичката канцеларија на Европската Унија (Еуростат).

На конференцијата учествуваа раководителите на националните статистички институции на земјите членки и кандидатки за членство во Европската Унија, како и високи претставници на меѓународни организации и технолошкиот сектор.

На конференцијата, одржана под мотото „Подготвеност на официјалните податоци и статистиката за вештачка интелигенција“, се разговараше за влијанието на вештачката интелигенција врз создавањето, објавувањето и користењето на официјалната статистика, достапноста на податоците и нивната одговорна повторна употреба, како и за зачувувањето на веродостојноста на официјалната статистика.

Исто така, акцент беше ставен на приспособувањето на официјалната статистика кон променливите потреби на корисниците, зајакнувањето на соработката меѓу националните заводи за статистика и утврдувањето заеднички приоритети и стандарди за иднината на Европскиот статистички систем во ерата на вештачката интелигенција.

Во рамките на конференцијата, претседателот на ТУИК, Арабачи, оствари билатерални средби со претседателката на Еуростат, Маријана Коцeва, како и со високи раководители на институциите учеснички. На средбите беа разгледани можностите за зајакнување на институционалната соработка, зголемување на размената на информации и искуства, како и спроведување заеднички активности.

Во рамките на конференцијата, ТУИК и Државниот завод за статистика на Република Северна Македонија потпишаа меморандум за разбирање за унапредување на соработката во областа на статистиката.

Меморандумот има цел да ја зголеми размената на информации и искуства во врска со меѓународните статистички стандарди и методи, да развива заеднички активности за техничка соработка, да организира посети на експерти, работилници и семинари, како и да ги зајакне институционалните односи меѓу двете институции.