Канадскиот премиер Марк Карни го нарече претстојниот референдум за независност на Алберта од Канада „опасен блеф“, споредувајќи го со гласањето за Брегзит што го натера Обединетото Кралство да ја напушти Европската Унија.

Марк Карни, кој ја водеше Банката на Англија за време на Брегзит, рече дека 10 години по референдумот, Велика Британија „се обидува да го поништи она за што луѓето не мислеа дека гласаат, а што на крајот го добија“.

Тој исто така рече дека гласањето за независност не треба да се злоупотребува како алатка за зајакнување на преговарачката позиција на Алберта со Отава, велејќи дека тоа може да има несакани последици.

Жителите на Алберта прво ќе одлучат на 19 октомври дали сакаат да останат дел од Канада, пред да се одржи обврзувачко гласање за независност на подоцнежен датум, во зависност од исходот.

Во понеделник, Карни изјави дека ќе се залага за единство на Канада во наредните месеци.

„Мораме да бидеме многу внимателни во врска со ова, рече тој, додавајќи дека „постои многу силен, позитивен аргумент во корист на Канада, во корист на силна Алберта во Канада која е обединета“.

Застапниците за независност на Алберта веруваат дека покраината богата со нафта долго време е запоставена од страна на носителите на одлуки во Отава, главниот град, и дека федералните политики за животна средина ја попречуваат нејзината способност да гради нафтоводи и гасоводи и да развива природни ресурси.

Анкета објавена во понеделник од канадската фирма Ангус Рид сугерира дека тројца од пет жители на Алберта би гласале нивната покраина да остане во Канада.

На гласањето за Брегзит во 2016 година, 52% од луѓето во Обединетото Кралство гласаа за напуштање, додека 48% гласаа за останување. Обединетото Кралство формално ја напушти ЕУ во 2020 година.

Поддржувачите на иницијативата за одвојување на Островот тврдеа дека членството во ЕУ го задушува економскиот раст и суверенитетот на Обединетото Кралство.