Михал Оксински, вооружениот напаѓач кој во саботата уби шест лица на плоштад во Краков посетувал веб-страници за норвешкиот масовен убиец Андерс Беринг Брејвик, изјави полскиот министер за правда, додавајќи дека постојат индикации дека убиецот бил под влијание на десничарскиот екстремизам.
Мотивите на напаѓачот се предмет на жестока политичка дебата откако министерот за внатрешни работи Марчин Киервински само неколку часа по инцидентот, изјави дека напаѓачот бил мотивиран од крајно десничарска идеологија.
Јарослав Качински, лидерот на опозициската националистичка партија Право и правда (ПиС), ја нарече изјавата на Кирвински „очигледна лага“, со алузија дека Оксински бил крајно левичарски ориентиран, а членовите на владата се чини дека се повлекоа во понеделник, објави Ројтерс.
Сепак, министерот за правда Валдемар Зурек во вторникот за Радио Краков изјави дека има „многу силни индикации за десничарски екстремизам“ во мотивите на осомничениот, именуван од обвинителите како 24-годишниот Михал Оксински, фабрички работник.
Оксински почина во болница во понеделник по престрелката со полицијата откако отвори оган од автомобил на историскиот главен плоштад во Краков, популарна туристичка дестинација.
„Јасно е дека тој посетил веб-страници поврзани со Андерс Брејвик“, рече Зурек.
Брејвик, антимуслимански неонацист, уби осум лица со автомобил-бомба во Осло во јули 2011 година, а потоа застрела 69, претежно тинејџери, во младински камп на Лабуристичката партија на островот Утоја.
Зурек додаде дека жолто знаме со змија и зборовите „Не ме гази“ е пронајдено во собата на напаѓачот.
Познато како знаме Гадсден, првпат се појавило за време на Американската револуција во 18 век и го користеле крајнодесничарски групи во Соединетите Држави во модерното време, објави Ројтерс.
Министерот рече дека симболи „кои би можеле да укажуваат на оваа насока на истрага“ се пронајдени и на работното место на Оксински.
Пратеникот на ПиС, Михал Војчик, изјави за Ројтерс дека е „згрозен“ од тврдењата на Зурек.
„Според мене, претставниците на полската влада се однесуваат неправедно кон меѓународната заедница“, рече тој.
Киервински во вторникот изјави за јавното радио дека не повлекува ништо што го кажал, но ги чека резултатите од истрагата.
Телата на таткото, мајката и сестрата на Оксински беа пронајдени во нивниот дом во саботата. Официјалните лица велат дека и тие веројатно биле убиени од Оксински.
