Ербас (Airbus) постави Гинисов светски рекорд за најдолг лет без застанување (според изминатото растојание) со комерцијален авион, реализирајќи патување во траење од 24 часа и 24 минути помеѓу Мелбурн, Австралија и Тулуз, Франција, во текот на јули, соопшти во понеделникот производителот на авиони.

Авионот полета од Мелбурн на 27 јули во 17:27 часот по локално време (07:27 GMT), а слета во Тулуз на 28 јули во 09:51 часот по локално време (07:51 GMT), при што помина 12.503 наутички милји (23.155 километри, односно 14.388 милји) без ниту едно застанување.

Летот беше изведен како дел од серијата пробни летови за моделот A350-1000ULR, кој е развиен специјално за австралиската авиокомпанија „Квантас ервејс“ (Qantas Airways) во рамките на нивната иницијатива „Проект Сончев изгрев“ (Project Sunrise).

Рекордот е официјално потврден врз основа на податоци од авионот, кои беа независно верификувани од Меѓународната воздухопловна федерација и платформата за следење летови „Флајт-радар 24“ (Flightradar24).

Авионот прелета над Сиднеј, по што се упати кон Лос Анџелес, преминувајќи го Тихиот Океан.

Потоа, леталото прелета преку Северна Америка и Атлантскиот Океан, помина над Лондон и продолжи кон Тулуз.

За време на патувањето, екипажот имаше можност да види две зајдисонца и две изгрејсонца.

Авионот е опремен со дополнителен резервоар за гориво со капацитет од 20.000 литри и го придвижуваат мотори од типот „Ролс-Ројс Трент XWB“ (Rolls-Royce Trent XWB). „Квантас“ има нарачано 12 вакви авиони.