Хрватски борбен авион „Рафал“ пресретна патнички авион од типот „Боинг“ од Малта над Кореница, откако на неговиот транспондер беше активиран кодот 7500, што укажува на киднапирање на леталото, соопшти хрватското Министерство за одбрана.

Малтешкиот авион летал на релација од Грција кон Германија, а Здружената команда за воздушни операции во Торехон наредила полетување на хрватскиот „Рафал“ за пресретнување и визуелна идентификација на цивилниот авион.

Информацијата за активираниот код на транспондерот била добиена од центарот за известување во Италија.

Хрватскиот „Рафал“ визуелно го идентификувал патничкиот авион и воспоставил радио-врска со него, по што во 11:18 часот извршил борбена патрола во воздушниот простор меѓу Риека и Делнице и го испратил леталото надвор од хрватскиот воздушен простор. Цивилниот авион влегол во словенечкиот воздушен простор во 11:20 часот.

За време на операцијата, поради проценката дека авионот може да претставува закана, хрватските потпретседатели на Владата и министри Иван Анушиќ, Томо Медвед, Давор Божиновиќ и Олег Бутковиќ биле во координација со премиерот Андреј Пленковиќ и со хрватското Воено воздухопловство.

Од Министерството за одбрана наведоа дека операцијата ја покажала обученоста и брзината на реакција на хрватските пилоти на повеќенаменските борбени авиони „Рафал“, како и способностите на тие летала.

Од 1 јануари 2026 година, Хрватска самостојно го надгледува и штити својот воздушен простор со авионите „Рафал“ како дел од Интегрираниот систем на НАТО за воздушна и ракетна одбрана.