Меѓународната федерација на фудбалски сојузи (ФИФА) од својата официјална платформа за препродажба на билети ги отстрани билетите за Светското првенство за натпреварите што треба да се играат на стадионот БМО во Торонто, откако канадската покраина Онтарио минатата недела донесе закон, со кој се забранува препродажба на билети по цена над номиналната вредност.

БМО стадионот во Торонто ќе биде домаќин на шест натпревари од Светското првенство. Пет во првото коло од натпреварувањето и еден во осминафиналето.

Законот, наречен „Закон за ставање навивачите на прво место“, наведува дека никој не може да стави билет на продажба на секундарниот пазар за цена поголема од номиналната вредност на билетот.

Владата соопшти дека ограничувањето за препродажба ќе „ги заштити навивачите и потрошувачите од експлоататорски, професионални препродавачи кои вештачки ги зголемуваат цените на билетите“.

Ова значи дека секој што купил билет над номиналната вредност пред да се донесе законот, сега губи пари ако го препродаде. На пример, ако некој првично купил билет за 600 долари, а потоа го препродал на некој друг за 1.200 долари, тоа лице сега ќе мора да го препродаде за 600 долари.

Компаниите што нема да се придржуваат ќе се соочат со казни од 3.000 долари, а казната може да достигне до 250.000 долари за континуирано непочитување.

ФИФА привремено ги повлече преостанатите билети за натпреварите во Торонто од продажба, додека нејзината платформа за препродажба е „реконфигурирана за да се усогласи со законот што стапи на сила во петок“.

Се очекува билетите за натпреварите во Торонто повторно да бидат објавени на пазарот на ФИФА според новото законодавство на Онтарио.

Најновите бројки на ФИФА покажуваат дека веќе се продадени повеќе од пет милиони билети, од очекуваниот вкупен број од нешто над шест милиони за турнирот.

Сопствениците на билети можат да препродаваат на „пазарот“ на ФИФА по која било цена, при што еден продавач бара речиси 11,5 милиони долари за билет од категорија 3 за финалето.

Светското првенство, чии домаќини се САД, Канада и Мексико, започнува на 11 јуни.