Кинескиот претседател Кси Џинпинг се согласи со американскиот претседател Доналд Трамп дека Ормускиот Теснец мора да остане отворен, соопшти Белата куќа денес по самитот САД-Кина во Пекинг.
Според Ен-Би-Си Њуз, Белата куќа објави соопштение за разговорите меѓу Трамп и Кси во кое воопшто не се споменува прашањето за Тајван, туку главно се фокусира на војната во Иран и ситуацијата со Ормускиот Теснец.
„Претседателот Трамп имаше добар состанок со кинескиот претседател Кси“, изјави официјален претставник на Белата куќа.
„Двете страни разговараа за начините за зајакнување на економската соработка меѓу нашите две земји, вклучително и проширувањето на пристапот до пазарот за американските бизниси во Кина и зголемувањето на кинеските инвестиции во нашите индустрии. Лидерите на голем број од најголемите компании во Соединетите Американски Држави се придружија на дел од состанокот“, изјави претставникот.
„Двете страни се согласија дека Ормускиот Теснец мора да остане отворен за да се поддржи слободниот проток на енергeнти. Претседателот Кси, исто така, јасно го истакна противењето на Кина за милитаризација на теснецот и за каков било напор за наплата на такса за негово користење и изрази интерес за купување на повеќе американска нафта, со цел да се намали зависноста на Кина од теснецот во иднина“, додаде официјалниот претставник на Белата куќа.
„Двете земји се согласија дека Иран никогаш не смее да поседува нуклеарно оружје“, истакна официјалниот претставник.
Официјалниот претставник, исто така, изјави дека Трамп и Кси ја истакнале потребата да се продолжи напредокот во запирањето на шверцот на суровини за фентанил во САД, како и да се зголеми кинескиот откуп на американски земјоделски производи.
Според кинеската државна новинска агенција Синхуа, Кси му рекол на Трамп дека „двете земји ќе имаат судири, па дури и конфликти, доколку прашањето за Тајван не се реши правилно“.
Кси, исто така, нагласил дека економските врски меѓу двете нации се „заемно корисни и по својата природа се од типот ’победа-победа‘“, пренесува Синхуа.
Двете страни се согласија да изградат билатерален однос на конструктивна стратегиска стабилност, со цел да се обезбедат стратегиски насоки за врските во следните три години и понатаму, што, според Кси, би било поздравено од „народите на двете земји, како и од меѓународната заедница“, објави Синхуа.
