Американскиот претседател Доналд Трамп бил „налутен“ од јавната критика на израелскиот премиер Бенјамин Нетанјаху за предложената продажба на борбени авиони Ф-35 од страна на САД на Туркије, објави „Аксиос“.

Повикувајќи се на двајца претставници на Белата куќа, медиумот објави дека не е закажана средба и покрај извештаите во израелските медиуми дека Трамп ќе биде домаќин на Нетанјаху следната недела.

Еден функционер наводно рекол дека Трамп бил налутен од забелешките на Нетанјаху за време на интервјуто за „Фокс њуз“ кратко пред американскиот претседател да отпатува во Анкара на самитот на НАТО на 7 и 8 јули.

Втор функционер рече дека Трамп верува оти Нетанјаху „нема право“ да интервенира во предложената продажба на оружје.

Израелскиот премиер наводно барал средба со Трамп повеќе од две недели. Тој ја посетил Овалната соба шест пати откако Трамп се врати на функцијата во јануари 2025 година.

Извештаите во израелските медиуми посочија дека Нетанјаху планира да отпатува во Вашингтон овој викенд за да присуствува на погребот на починатиот сенатор Линдзи Греам и да се сретне со Трамп во понеделник.

Патувањето беше откажано во четврток откако беше одложена погребната служба на Греам, се вели во соопштението од канцеларијата на Нетанјаху.

Двајца претставници на Белата куќа наводно рекле дека Нетанјаху сакал да се сретне со Трамп, но дека никаква средба не е потврдена, ниту пак е предвидена во распоредот на претседателот.

„Нашиот впечаток беше дека Биби се обидуваше да организира состанок“, цитираше Аксиос изјава на официјален претставник.

„Аксиос“ рече дека претставниците на Белата куќа не ја исклучиле можноста за состанок кога Нетанјаху конечно ќе отпатува во Вашингтон за комеморацијата на Греам.

Одложувањето доаѓа во услови на растечки тензии меѓу администрацијата на Трамп и владата на Нетанјаху околу војната со Иран.

Извештајот доаѓа откако американскиот потпретседател Џ.Д. Венс во средата посочи дека членови на израелската влада се обидуваат да ги поткопаат дипломатските напори на Вашингтон со Техеран во обид да ја продолжат воената кампања.