Норвешка повеќе не се смета за „зелена батерија“ на Европа и ќе продолжи да ги развива своите нафтени и гасни ресурси во Баренцовото Море, и покрај европската поддршка за мораториум за снабдување со јаглеводороди од Арктикот, изјави за Ројтерс норвешкиот министер за енергетика Терје Асланд.
По руската инвазија на Украина во 2022 година, Норвешка стана најголемиот снабдувач на природен гас во Европа, задоволувајќи околу 30 проценти од побарувачката на Европската Унија и Велика Британија.
Минатата година, производството на гас во земјата беше близу до рекордни нивоа, додека производството на нафта достигна највисоко ниво од 2009 година. Официјалните прогнози покажуваат дека производството нагло ќе се намали по 2030 година, освен ако не се откријат и развијат нови ресурси.
„Во денешната геополитичка и безбедносна средина и со оглед на ситуацијата со ресурсите, верувам дека континуираните активности во Баренцовото Море им служат и на норвешките и на европските интереси“, изјави Асланд за Ројтерс во интервју пред OНС, норвешката двегодишна конференција за енергија, која започнува во Ставангер.
Европската Унија моментално ја поддржува забраната за ново дупчење во Арктикот од еколошки причини, но размислува за ревидирање на својата политика како одговор на загриженоста за енергетската безбедност.
Во разговорите со претставници на ЕУ, Норвешка тврдеше дека делови од Баренцовото Море се отворени за нафтени активности, како и дека се без мраз како Северното Море.
Затоа, според Осло, тие се помалку склони кон излевање на нафта и други влијанија врз животната средина и помагаат во одржувањето на работните места и населбите во северните региони на земјата што граничат со Русија.
Асланд верува дека Брисел ги разбрал аргументите на Норвешка, но додаде дека суверено право на земјата е да ги развива ресурсите на Баренцовото Море дури и ако ЕУ продолжи да го поддржува мораториумот.
„Ние ќе ги развиваме овие области и зависи од ЕУ да одлучи дали да има „мораториум за купување гас или нафта“, рече Асланд.
Покрај нафтата и гасот, Норвешка изминативе години произведува вишок обновлива енергија. Земјата порано се претставуваше како „зелена батерија“ на Европа, но министерот вели дека таа идеја сега е застарена.
