Палестинските власти денес предупредија на еколошка и хуманитарна катастрофа во Појасот Газа, наведувајќи дека израелските напади оставиле зад себе до 68 милиони тони урнатини.
Палестинската управа за квалитет на животната средина го објави предупредувањето во соопштение по повод Меѓународниот ден за спречување на искористувањето на животната средина во војни и вооружени конфликти, што се одбележува секоја година на 6 ноември.
Како последица на израелските разурнувања, низ Газа се натрупале меѓу 61 и 68 милиони тони урнатини, меѓу кои околу четири милиони тони опасен отпад и најмалку 50.000 тони азбест, канцероген влакнест материјал што во минатото широко се користел во градежништвото и за изолација, соопшти Управата.
Во израелската војна биле уништени 82 отсто од земјоделското земјиште во Газа, 97 отсто од маслиновите и другите овошни дрвја, како и 84 отсто од инфраструктурата за водоснабдување и канализација, се наведува во соопштението.
Уништувањето на санитарната инфраструктура довело до тоа секојдневно околу 120.000 кубни метри непречистена отпадна вода да се излеваат на улиците и во водните басени низ Газа, се додава.
Од октомври 2023 година, во израелската војна врз Газа, која палестинските власти ја квалификуваат како геноцид, загинале повеќе од 74.000 Палестинци, а над 175.000 се повредени, покрај големите разурнувања на цивилната инфраструктура.
Управата документирала и 760 израелски напади врз животната средина на окупираниот Западен Брег од почетокот на 2026 година до крајот на септември, насочени кон земјоделско земјиште, вегетација, водни ресурси и инфраструктура.
Според управата, 203 напади биле насочени кон земјоделско земјиште и природни резервати, вклучително и уништување маслинови насади со булдожери, изградба на патишта за населбите и одземање палестинско земјиште за воени цели и проширување на населбите.
Уште 178 напади биле насочени кон шуми и вегетација, вклучително и искоренување на илјадници дрвја, меѓу кои околу 100.000 маслинови дрвја, при што загубите се проценуваат на 67 милиони долари, соопшти Управата.
Управата евидентирала и 185 инциденти поврзани со отпад и опасен материјал од урнатини, 52 напади што ја загрозиле безбедноста на снабдувањето со храна и сточниот фонд, 37 напади врз водни ресурси и бунари, 35 напади врз водоводни цевководи и системи за наводнување, како и пет инциденти поврзани со канализациските системи.
Таа ја повика меѓународната заедница да преземе мерки за запирање на прекршувањата и да им овозможи на Палестинците да остваруваат контрола врз своите природни ресурси и да ги заштитуваат.
Нападите на израелската војска и насилството на израелските доселеници врз Палестинците и нивниот имот на окупираниот Западен Брег се интензивираа од почетокот на војната во Газа. Меѓу инцидентите се убиства, апсења, уривање објекти, уништување имот, расчистување земјиште со булдожери, раселување и проширување на населбите.
