Исланд се подготвува да одржи референдум за тоа дали да продолжи со преговорите за членство во Европската Унија, а прашањето за суверенитетот повторно е во центарот на дебатата. Одлуката беше под влијание и на политиката на Доналд Трамп кон Гренланд.

Трамп четири пати го нарече Гренланд Исланд во своите изјави, што предизвика загриженост во таа земја.

Застапниците на членството во ЕУ веруваат дека поблиските врски со Европа би му обезбедиле на Исланд поголема безбедност и заштита во нестабилна геополитичка средина. Противниците, од друга страна, предупредуваат на можна загуба на независноста, особено кога станува збор за контрола на богатите риболовни подрачја.

Доколку граѓаните го поддржат продолжувањето на преговорите, ќе следи повеќегодишен процес, а конечната одлука за членство повторно би ја донеле исландските гласачи.

„Секогаш ги прашувам моите колеги од Ирска, Финска или Луксембург, или од некоја помала земја во рамките на Европската Унија, дали некако го изгубиле својот суверенитет или независност. Ме гледаат како да сум луда жена и се прашуваат какво прашање е тоа. Всушност, тие го велат спротивното - успеавме и станавме посилни како дел од поголема група. Ова многу јасно се виде за време на ситуацијата со Гренланд, кога Европската унија и нејзините поголеми и помали земји-членки останаа цврсто обединети“, рече Торгердур Катрин Гунарсдотир, министерка за надворешни работи на Исланд.