Американскиот претседател Доналд Трамп изјави дека Вашингтон ќе изгради две големи воени бази на Гренланд врз основа на нов договор со Данска, истакнувајќи пред Генералното собрание на ОН дека договорот ѝ дава на САД „трајна контрола“ врз безбедноста на оваа арктичка територија.

„Веднаш ќе започнеме со процесот на воспоставување значително воено присуство на соодветни локации. Ќе изградиме две многу големи воени бази“, рече Трамп денеска во своето обраќање пред Генералното собрание на ОН во Њујорк во вторникот.

Трамп изјави дека договорот, постигнат со Кралството Данска и Гренланд, ѝ овозможува на САД „трајна контрола врз безбедноста и сите други потреби“ на таа територија.

Тој наведе дека овој аранжман ќе му овозможи на Вашингтон „целосна способност да го стори она што е неопходно за одбрана на американскиот континент, како и на Европа и други региони“.

„На ниту еден противник на САД повеќе нема да му биде дозволено да воспостави воено присуство на Гренланд или да прави чувствителни инвестиции таму без наше изречно писмено одобрение“, рече тој.

Трамп соопшти дека договорот ќе биде потпишан денеска, на маргините на Генералното собрание на ОН во Њујорк, и ги пофали Данска и Гренланд, истакнувајќи дека страните „навистина изградиле цврста врска“ за време на преговорите.

Гренланд, самоуправна територија во рамките на Кралството Данска, го привлече интересот на САД поради својата стратешка положба и огромните минерални ресурси.

Договорот се реалиизира  откако Трамп во повеќе наврати ја изрази својата желба да преземе контрола врз Гренланд од стратешки и историски причини, укажувајќи на интересот и растечкото присуство на Кина и Русија во регионот.