Албанскиот премиер Еди Рама повика на дијалог, додека антивладините протести низ земјата продолжија седми ден по ред.

Како што пренесе новинската агенција АТА, Рама поставил столици со натпис „Дијалог“ пред својата канцеларија.

„Кој сака дијалог – каде и да сака и кога и да сака, па дури и овде, ако сака – јас, заедно со владата, сум на располагање“, изјавил Рама.

Премиерот нагласи дека нема да седне на преговарачка маса со поединци кои учествуваат во насилство.

„Единствените што не се добредојдени се оние што вршат насилство и оние што не се оградуваат од него“, изјави Рама.

Протестите започнаа на 13 октомври, првично поттикнати од загриженоста на студентите во врска со трошоците за образование, условите на универзитетите и економските перспективи.

Демонстрантите, исто така, изнесоа и пошироки поплаки поврзани со корупцијата и зголемените трошоци за живот.