Иранскиот претседател Масуд Пезешкијан денеска на својот профил на X објави дека ефикасноста на мировните преговори зависи од целосната посветеност на договорените обврски и нивното прецизно спроведување.

„Напредокот на овој пат ќе се мери со практично почитување на прифатените одговорности. Изјавите надвор од договорениот текст не помагаат за напредок во преговорите“, рече Пезешкијан за време на патувањето во Пакистан каде што ќе „оддаде почит на жртвите од наметнатата војна“, особено на учениците од училиштето Минаб кои загинаа по нападот на американските и израелските сили.

Пезешкијан рече дека напорите на пакистанските власти за заштита на правата на иранскиот народ одиграа ненадминлива улога во финализирањето на меморандумот за разбирање (MoU) потпишан со САД, објави иранската државна новинска агенција Тасним.

„Напорите што ги вложија овие драги луѓе беа такви што можеби нивната улога во воспоставувањето мир во регионот беше поголема од нашата. Со спроведување на Меморандумот за разбирање, може да се намалат многу проблеми во регионот на Блискиот Исток во ситуација каде што продолжуваат неправедните војни и агресијата на ционистичкиот режим против исламските земји“, рече Пезешкијан.

Тој изрази надеж дека започнатиот процес ќе доведе до воспоставување одржлива безбедност во регионот и ограничување на агресорите.

„Проширувањето на односите меѓу Иран и Пакистан, како и со исламските земји, вклучувајќи ги Турција, Катар, Саудиска Арабија и други земји во регионот, се спроведува во согласност со пристапот што го нагласи врховниот верски водач на Иран и е приоритет на владата“, рече иранскиот претседател.