Од денеска, личната карта и возачката дозвола ќе бидат достапни на мобилен телефон. Министерството за дигитална трансформација ја промовираше мобилната апликација „м.Услуги“ (m.Uslugi), односно новиот мобилен пристап до дигиталните јавни услуги и електронските документи на граѓаните.

За време на презентацијата, министерот за дигитална трансформација Стефан Андоновски во живо ја активираше апликацијата и ја додаде својата електронска лична карта во дигиталниот паричник.

„Ова не е фотографија од личната карта, ниту ПДФ документ. Ова е електронска верзија на документот во мобилниот телефон“, рече министерот.

Една од функционалностите што беше демонстрирана е можноста за селективно споделување податоци. Наместо корисникот да го покажува целиот документ кога треба само да ја потврди својата возраст, апликацијата овозможува да се сподели само потребната информација.

„Ако единственото прашање е дали едно лице е полнолетно, нема потреба да се споделуваат адресата, бројот на документот и сите останати лични податоци. Современиот дигитален идентитет значи да се сподели само оној податок што е потребен“, рече Андоновски.

Тој нагласи дека целта не е постојните административни постапки само да се префрлат од шалтер на мобилен телефон, туку тие суштински да се поедноставуваат.

Покрај дигиталните документи, преку „м.Услуги“ се добива и мобилен пристап до првите електронски услуги.

„Со мобилната апликација м.Услуги правиме конкретен чекор кон модерна и поефикасна држава, во која граѓаните ќе имаат помалку шалтери, помалку документи и побрзи услуги. Суштината на дигитализацијата не е само воведување нова технологија, туку поедноставување на процедурите, поврзување на институциите и намалување на административниот товар за граѓаните и компаниите“, рече во своето обраќање премиерот Христијан Мицкоски.

Според него, ова е почеток на нов пристап во работата на јавната администрација, во кој времето на граѓаните се почитува, а институциите преземаат поголема одговорност за ефикасно и транспарентно функционирање.

„Нашата цел е сè повеќе услуги да бидат достапни дигитално, без непотребно губење време и повторно доставување документи што државата веќе ги поседува. Дигиталната трансформација е важен дел од реформите што ги спроведуваме и од нашата заложба за европски стандарди. Успехот ќе го мериме според конкретните резултати: колку време ќе заштедат граѓаните, колку постапки ќе се поедностават и колку услуги ќе можат да ги завршат брзо, едноставно и сигурно“, рече премиерот.

Апликацијата е замислена како единствен мобилен пристап до дигиталната држава- со дигитален идентитет, електронски документи, јавни услуги и известувања на едно место, а во следните фази и со интегрирани плаќања.

Апликацијата е бесплатна и нејзиното користење е целосно доброволно. Таа претставува дополнителен, побрз и поедноставен канал за пристап до јавните услуги и електронските документи, без да ги укинува останатите начини на кои граѓаните можат да комуницираат со институциите.

Целта е секој граѓанин кој сака да ги користи придобивките од дигиталните услуги да може тоа да го направи едноставно и без дополнителен трошок.