Вршителот на должноста претседател на Србија, Ана Брнабиќ изјави дека, согласно Уставот, крајниот рок за распишување на претседателските избори е 27 ноември. Таа напомена дека, доколку институциите се формираат брзо, функцијата вршител на должноста претседател на Републиката ќе ја преземе некој друг.

„Согласно Уставот на Република Србија, изборите ќе се одржат до 27 декември. Во секој случај, ќе видиме; доколку институциите се формираат брзо, тогаш некој друг ќе ја преземе функцијата вршител на должноста претседател на Републиката“, изјави Брнабиќ на прес-конференција во Претседателството на Србија, одговарајќи на прашање кога ќе ги распише претседателските избори.

Брнабиќ наведе дека брзото формирање на институциите во моментов е од најголема важност, за – како што рече таа – оние што победиле на изборите да можат да преземат одговорност за квалитетот на животот во земјата.

Таа изрази надеж дека до 27 ноември ќе биде формиран барем парламентот, додавајќи дека по повторувањето на парламентарните избори на одредени избирачки места оваа недела, како и по објавувањето на конечните резултати, таа во најкраток можен рок ќе го свика Народното собрание на Србија.