Премиерот на Албанија, Еди Рама, коментирајќи ги политичките случувања во Србија и европската перспектива на Западен Балкан, изјави дека Србија останува затворена за признавање на Косово.

Премиерот Рама учествуваше на панелот на Самитот за проширување на Јуроњуз 2026 во Брисел, форум на високо ниво посветен на проширувањето на Европската Унија и европската перспектива на земјите кандидатки за членство.

Рама изјави дека постојат многу сложени прашања, но додаде дека, на крајот на краиштата, нема ништо подобро од Европската Унија.

„Ние сме дел од регион што сè уште не е целосно дел од ЕУ, па затоа ние сме тие што слушаат лекции, а не држат лекции, тоа е правилото тука во Брисел. Затоа нема да му држам лекции никому, туку едноставно ќе кажам дека да, Србија е многу важен дел од мозаикот на Западен Балкан, но отсекогаш сум бил застапник на ставот дека не треба да дозволиме Србија да тргне во погрешна насока и да го напушти европскиот проект бидејќи тоа, пред сè, би му наштетило на нашиот регион“, рече, меѓу другото, Рама.

Зборувајќи и за последните политички случувања во Србија, Рама рече: „Она што го знам е дека победниците (на изборите) во Белград не покажуваат отвореност кон прашањето што ни е најблиско мене и на Албанците, а тоа е прашањето за признавање на Косово. Тие се целосно затворени за ова прашање, што значи дека музиката во Белград нема да се смени“, истакна Рама.

Зборувајќи повторно за Србија, Рама рече: „Србија покажа колебливост во нормализацијата не само со Косово, туку и во односот кон Русија и санкциите. Ни треба Србија да биде со нас, Србија треба да биде дел од соседство што треба целосно да биде дел од ЕУ. Србија треба да покаже резултати и целосно да го заслужи ова членство, целосно спроведувајќи го она што е неподлежен предмет на преговори во односите со ЕУ.“

Зборувајќи за процесот на европска интеграција на Албанија, Рама наведе дека планот за завршување на преговорите е поддржан од Европската комисија.

„Многу напорно работиме на заеднички план, план што е целосно поддржан од (Европската) Комисијата за да ги завршиме преговорите до крајот на 2027 година. Сè се одвива според планот и, доколку продолжи така до крајот на следната година, ќе ги завршиме преговорите“, изјави Рама.