Израелските власти издадоа воена наредба за запленување на повеќе од 26 дунуми палестинска земја северозападно од Рамала, на окупираниот Западен Брег, соопшти во вторникот една палестинска комисија.

„Воената наредба, издадена на 28 октомври, става 26,473 дунуми земјиште во Деир Низам, Ум Сафа и Атара под израелска воена контрола, за, како што наведува Израел, ’воени цели‘“, се вели во соопштението на Палестинската комисија за отпор против колонизацијата и ѕидот.

„Земјиштето е наменето за траса наречена ’итна оска Атерет – Неве Цуф‘, чија цел е да овозможи поврзување меѓу израелските населби во тој регион“, се додава во соопштението.

Наредбата ќе остане на сила до крајот на 2028 година и му доделува на израелската војска ексклузивно владение врз трасата, која е прецизирана во картите приложени кон наредбата, се наведува во соопштението.

Од Комисијата информираат дека 5,891 дунуми, односно околу 22,3 % од запленетата површина, се класифицирани од израелските власти како „државно земјиште“, додека преостанатите 20,582 дунуми не спаѓаат во таа категорија.

„Оваа траса може да ги зајакне врските меѓу нелегалните населби и истурените населби (т.н. ’аутпости‘) околу Атерет и Халамиш (познат и како Неве Цуф), а истовремено може да наметне дополнителни ограничувања за пристапот на палестинските сопственици до нивните парцели во близина“, се вели во соопштението.

Комисијата истакнува дека воената наредба предвидува привремено запленување и владение врз земјиштето, а не формален пренос на сопственоста. Сепак, се предупредува дека користењето на земјиштето за инфраструктура поврзана со населбите предизвикува загриженост поради проширувањето на израелската контрола во тој регион.

Израелските власти сè почесто користат воени наредби за запленување со цел да преземат контрола врз палестинската земја на окупираниот Западен Брег.

Обединетите нации ги сметаат израелските населби на Западниот Брег, вклучително и во Источен Ерусалим, за нелегални според меѓународното право. Резолуцијата 2334 на Советот за безбедност на ОН наведува дека населбите „немаат правна важност“, додека Меѓународниот суд на правдата, во советодавно мислење од јули 2024 година, изјави дека израелската окупација на палестинската територија е незаконска и повика на евакуација на населбите од Западниот Брег и Источен Ерусалим.