Рано утрово низ Франција беа блокирани неколку средни училишта и универзитети, а се очекува илјадници луѓе да излезат на улиците по повикот на студентските и ученичките организации, објави телевизискиот канал БФМТВ.

Блокадите продолжија во неколку средни училишта и универзитети во Париз, како и во Марсеј и Тулуз, каде што вчера беше попречена работата во 12 од вкупно 13 средни училишта во градот.

Неколку студентски и ученички организации во Лил, исто така, повикаа на продолжување на мобилизацијата, вклучително и преку демонстрации закажани за попладневните часови.

„Црниот вторник“, на кој повикаа организациите на средношколците, се очекува да се одржи и во Лион, каде што властите одобрија одржување на ученички демонстрации.

Според процените на париската полициска префектура, на улиците се очекува да излезат меѓу 15.000 и 30.000 демонстранти, на повик на студентските и ученичките организации.

Вчера, полициската префектура го забрани планираниот марш од Пантеонот до просторот околу седиштето на „Медеф“, со образложение дека трасата е „некомпатибилна со безбедносните ограничувања што се моментално на сила“.

Подоцна беше предложена алтернативна траса, помеѓу Порт де Шарантон и Порт де Монтреј, но одлуката беше оспорена пред Управниот суд.