Министерот за здравство на Република Туркије Кемал Мемишоглу соопшти дека е потпишан „Меморандум за разбирање во областа на здравството и медицинските науки“ со цел унапредување на соработката во здравствениот сектор меѓу Туркије и Северна Македонија.

Во објава на својот профил на социјалната мрежа „NSosyal“, Мемишоглу истакна дека продолжуваат да ја зајакнуваат меѓународната соработка во здравството.

Наведувајќи дека се сретнал со македонскиот министер за здравство Сашо Клековски, во рамки на 12. Турски конгрес на медицинскиот свет, Мемишоглу информираше дека го потпишале „Меморандумот за разбирање во областа на здравството и медицинските науки“ со цел унапредување на здравствената соработка меѓу двете земји.

„Целта ни е да ја унапредиме заедничката соработка во повеќе области, пред сè во јавното здравје, лековите и медицинските помагала, инвестициите во здравството и дигитализацијата на здравствените услуги. Искрено верувам дека во наредниот период нашата соработка во областа на здравството дополнително ќе се зајакне и посакувам потписите што ги ставивме да донесат добробит за двете земји“, истакна Мемишоглу.

Македонскиот министер за здравство Клековски во објава на социјалните мрежи информираше дека на средбата со турскиот колега Мемишоглу разговарале за билатералните односи, при што беше нагласено пријателството меѓу нашите две држави.

Министерот Клековски на својот колега му се заблагодари за помошта и солидарноста на Туркије по трагедијата во Кочани.

„Вистинските пријатели се покажуваат во најтешките моменти“, истакна Клековски.

Како подрачја на соработка се издвоени: дигитално здравство, стручна размена и едукација на специјалисти, соработка во лекови и вакцини

Исто така, потпишан е Меморандумот за разбирање за соработка во здравството – рамка за конкретни заеднички проекти во корист на граѓаните на двете земји.

Во конкретизацијата на соработката ќе се вклучи и USHAŞ – турската државна агенција за меѓународни здравствени услуги, информираше Клековски.