Илон Маск, извршен директор на Тесла (Tesla) и основач на СпејсЕкс (SpaceX), изјави дека би било „чест“ да го вработи извршниот директор на Нвидиа (Nvidia), Џенсен Хуанг, во услови на растечка неизвесност околу иднината на долгогодишниот лидер во оваа американска компанија за чипови.

„Тоа би било чест“, напиша Маск доцна во средата на социјалната мрежа X, одговарајќи на објава во која пишуваше: „Илон, те молам вработи го Џенсен“.

Маск не наведе конкретна позиција за Хуанг, ниту пак прецизираше која од неговите компании би можела да го вработи. Неговиот краток одговор не содржеше детали за официјална понуда за работа или за какви било разговори околу вработување.

Оваа размена на пораки уследи по извештајот на „Волстрит џурнал“ (The Wall Street Journal) дека управниот одбор на Нвидиа се подготвува да го смени Хуанг.

Членовите на одборот планирале да се состанат уште во средата за да одлучат за неговата иднина, објави весникот, повикувајќи се на извори запознаени со ситуацијата.

Извештајот се појави по откритијата за наводните вонбрачни афери на Хуанг со две жени – Алис Хуанг, поранешна раководителка во компанијата „Mega Speed ​​International“ која е обвинета дека е кинески шпион, како и со една вработена во самата Нвидиа.

Од Нвидиа најавија независна истрага од страна на управниот одбор, откако се појавија информации дека Хуанг можеби бил цел на активности на странски разузнавачки служби.

Овие случувања предизвикаа остар пад на цената на акциите на Нвидиа. Во тргувањето по затворањето на берзата во средата, вредноста на акциите падна за 14,95 долари, односно 8,61%, достигнувајќи 158,78 долари. Претходно, редовното тргување заврши со цена од 173,73 долари, што претставуваше пораст од 4,84 долари, или 2,87%.

И весникот „Фајненшел тајмс“ (Financial Times) објави дека управниот одбор треба да одлучи за иднината на Хуанг по избувнувањето на скандалот.

Според годишниот извештај на компанијата, Хуанг е еден од основачите на Нвидиа (во 1993 година) и од самиот почеток ја извршува функцијата претседател и извршен директор. Тој е исто така и член на управниот одбор.

Неговото евентуално заминување би претставувало голема промена во раководството на компанијата, која стана доминантен снабдувач на чипови што се користат за развој и функционирање на системи за вештачка интелигенција. Експанзијата на Нвидиа го стави Хуанг во центарот на глобалниот бум на инвестиции во вештачка интелигенција, како и на технолошкото ривалство меѓу Вашингтон и Пекинг.