Европската комисија во среда започна постапка што ќе ѝ овозможи на Европската Унија да стане членка основач на Специјалниот суд за кривично дело агресија против Украина.
Откако земјите-членки ќе го прифатат предлогот, Комисијата ќе може да испрати формално известување за намерата на ЕУ да се приклучи на судот како членка основач.
Овој статус би ѝ дал на ЕУ централна улога, вклучително и членство во одборот на специјалниот суд и назначување судии.
Специјалниот суд ќе има мандат да ги гони високите политички и воени лидери за кривично дело агресија против Украина.
Се воспоставува во рамките на Советот на Европа, по потпишувањето на договорот меѓу Украина и Советот на Европа за основање на судот на 25 јуни 2025 година.
Ова е прв пат ваков суд да се основа под покровителство на Советот на Европа.
„Правдата за жртвите на агресија е најдобриот пат кон траен мир. Потрагата по правда е исто така пречка за потенцијалните агресори, изјави високата претставничка на ЕУ за надворешни работи и безбедносна политика“, Каја Калас.
ЕУ одигра водечка улога во изготвувањето на основачките законски текстови на Специјалниот суд, кои беа политички поддржани на 9 мај 2025 година од меѓународна коалиција на држави и меѓународни организации.
Русија, која беше исклучена од Советот на Европа кратко време по почетокот на нејзината инвазија на Украина во февруари 2022 година, ги отфрли како „ништовни“ сите идни одлуки на овој суд.
