Марин Ле Пен, лидерката на француската крајна десница, денес изјави дека нема да учествува на претседателските избори следната година ако апелациониот суд во Париз ја потврди одлуката, со која ќе ѝ се наметне обврска да носи алка за електронски надзор поради наводната злоупотреба на средствата на Европската Унија.

Се очекува апелациониот суд да донесе одлука во вторник.

Ле Пен (57) ја оспорува пресудата од март 2025 година во која таа и неколку членови на нејзината партија Национален собир беа прогласени за виновни за злоупотреба на средствата на Европскиот парламент во врска со вработувањето на асистенти во периодот од 2004 до 2016 година, за кои се вели дека работеле за партијата, а не за потребите на Парламентот, објавува АП.

Ако пресудата биде потврдена, може да ѝ биде забрането да извршува јавни функции или да биде обврзана да носи алка за електронски надзор на ногата или и двете.

„Ако можам да бидам кандидат, ќе бидам кандидат, под услов да можам да водам кампања. Бидејќи ако ми е дозволено да бидам кандидат, но во пракса сум спречена слободно да водам кампања, тогаш разбирате дека тоа не е можно“, рече таа.

Во однос на алката, таа смета дека не може да се потпре на судијата да ѝ дозволи да оди на предизборен митинг или да го посети пазарот.

Ле Пен ги негираше обвинувањата дека била на чело на групата која систематски ги злоупотребувала средствата од ЕУ.

Првиот круг од претседателските избори во Франција ќе се одржи на 18 април, додека вториот круг е закажан за 2 мај.

Во март 2025 година, париски суд пресуди дека Ле Пен била во центарот на „систем на измами“ преку кој нејзината партија наводно проневерила 2,9 милиони евра од средствата на Европскиот парламент.

Таа беше осудена на петгодишна забрана за вршење јавни функции и две години домашен притвор со електронски мониторинг.

„Ако не можам да бидам кандидат, ќе ги искористам сите расположливи правни средства за жалба“, рече Ле Пен, додавајќи дека случајот би можел да оди пред Касацискиот суд, кој не ги разгледува фактите, туку само ја проверува легалноста на судските одлуки.

Ле Пен се смета за еден од главните фаворити за наследник на францускиот претседател Емануел Макрон на изборите во 2027 година, а доколку не се кандидира, се верува дека нејзиниот близок соработник Џордан Бардела би можел да биде кандидат.

Запрашана за разликите меѓу нив, Ле Пен рече дека таа е природен кандидат на нејзиниот политички табор по трите претходни претседателски кампањи, истакнувајќи дека двајцата се „комплементарни“.