Иранската Исламска револуционерна гарда (ИРГЦ) денес соопшти дека извршила напад врз четири брода во северниот дел на Персискиот Залив, за кои наведе дека вршеле претовар на нафта од еден на друг брод.

Поморските сили на ИРГЦ во соопштение наведоа дека „нападнатите бродови сè уште биле во пламен“.

Понатаму се додава дека четирите пловни објекти биле забележани како вршат претовар на нафта и дека биле нападнати истовремено поради пловење по „неовластени рути“.

ИРГЦ ги обвини САД дека „ги охрабруваат бродовите да минуваат низ поморски премин во кој се поставени мини“, додавајќи дека тоа доведува до „зголемување на поморските инциденти“.

Во соопштението се упатува предупредување до Вашингтон дека ако САД продолжат со ваквиот пристап, опсегот на иранскиот одговор „ќе ги вклучи и американските бази во регионот“.

На 28 февруари, Соединетите Американски Држави и Израел започнаа војна против Иран, кој возврати со напади врз Израел и американските објекти во земјите од регионот, сè до постигнувањето прекин на огнот во април.

Подоцна, во услови на застој во преговорите меѓу двете земји, и покрај потпишувањето на Меморандумот за разбирање кон средината на јуни, САД извршија напади врз цели во Иран.

На 12 јули, Иран објави дека повторно го затворил Ормускиот Теснец, откако на 8 јули продолжија нападите од страна на САД.