Presidenti i Këshillit Evropian Antonio Costa, presidentja e Komisionit Evropian Ursula von der Leyen dhe presidenti ukrainas Volodymyr Zelenskyy të enjten bënë thirrje për avancim të menjëhershëm të negociatave të anëtarësimit.
“Presidentët vlerësuan progresin e rëndësishëm që Ukraina ka bërë në rrugën e saj drejt BE-së. Ata kërkuan hapjen pa vonesë të klasterëve të negociatave”, thuhet në një deklaratë të përbashkët të lëshuar pas takimit të tyre në administratën qipriote greke.
Ukrainës iu dha statusi i vendit kandidat për në BE në vitin 2022, pas fillimit të luftës me Rusinë, ndërsa negociatat për anëtarësim nisën zyrtarisht në vitin 2024.
“Tani është koha për të shikuar përpara dhe për të përgatitur hapin e radhës. Dhe hapi i radhës është hapja e grupit të parë të negociatave për anëtarësimin e Ukrainës në Bashkimin Evropian”, tha Costa për gazetarët, i shoqëruar nga von der Leyen dhe Zelenskyy.
Të tre udhëheqësit theksuan nevojën për të ruajtur presionin ndaj Moskës për t’i dhënë fund “agresionit” dhe për t’u angazhuar në negociata “kuptimplota” për paqe.
Ata gjithashtu mirëpritën miratimin e një huaje prej 90 miliardë eurosh (rreth 105 miliardë dollarë) për mbështetjen e Ukrainës për vitet 2026 dhe 2027, që synon ta ndihmojë vendin të përmbushë nevojat urgjente buxhetore dhe të mbrojtjes, duke bërë thirrje njëkohësisht edhe për vende të treta që të ndihmojnë në mbylljen e boshllëqeve financiare, duke e theksuar nevojën për mbështetje të qëndrueshme ndërkombëtare.
