Departamenti amerikan i Drejtësisë nën Presidentin Donald Trump ka riklasifikuar të enjten marihuanën mjekësore të licensuar nga shtetet dhe të miratuar nga Administrata Amerikane e Ushqimit dhe Barnave (FDA), duke e konsideruar si një substancë më pak të rrezikshme.
Prokurori i Përkohshëm i Përgjithshëm Todd Blanche nënshkroi urdhrin, i cili e zhvendos marihuanën nga institucionet e licensuara nga shtetet dhe FDA-ja nga Lista I në Listën III sipas ligjit federal.
“Këto veprime do të mundësojnë kërkime më të synuara dhe më rigoroze mbi sigurinë dhe efikasitetin e marihuanës, duke zgjeruar qasjen e pacientëve në trajtime dhe duke fuqizuar mjekët për të marrë vendime më të informuara shëndetësore,” shkroi Blanche në platformën amerikane të rrjeteve sociale X.
Substancat e Listës I klasifikohen si substanca të dëmshme pa përdorim të pranuar mjekësor dhe me potencial të lartë abuzimi.
Ndërsa substancat e Listës III “përkufizohen si droga me potencial të moderuar deri të ulët për varësi fizike dhe psikologjike,” sipas faqes së Agjencisë për Zbatimin e Ligjit të Drogave (DEA). Në këtë kategori përfshihen kodeina, ketamina, steroidet anabolike dhe testosteroni.
Edhe pse ligji federal vazhdon të kufizojë marihuanën, ligjet në nivel shtetesh kanë krijuar një sistem të ndryshëm legaliteti nga shteti në shtet. Rreth gjysma e shteteve amerikane e kanë legalizuar plotësisht marihuanën, ndërsa rreth 16 shtete të tjera e kanë legalizuar përdorimin mjekësor.
Veprimi i Departamentit të Drejtësisë nuk e ndryshon ligjshmërinë e marihuanës në nivel federal, por lehtëson kërkimet mbi efektet e saj. Urdhri i Blanche gjithashtu përshpejton një seancë për riklasifikimin më të gjerë të substancës.
