Federata Irlandeze e Futbollit (FAI) njoftoi të enjten se ka tërhequr mbështetjen për rizgjedhjen e Gianni Infatinos në postin e presidentit të FIFA-s. 

Organi drejtues i futbollit në Republikën e Irlandës bëri të ditur se bordi i tij ka vendosur të tërheqë letrën e mbështetjes për Infantinon, të cilën e kishte dorëzuar në fillim të këtij viti.

“Pas një mbledhjeje të Bordit të FAI-t, u mor vendimi për të tërhequr letrën e mbështetjes që Federata kishte dërguar në fillim të këtij viti. Që atëherë, i kemi shkruar FIFA-s për të shpjeguar arsyetimin tonë”, tha FAI në një deklaratë.

“Federata është mirënjohëse për mbështetjen që FIFA i jep futbollit irlandez, por zhvillimet e fundit kanë ngritur shqetësime të mëdha lidhur me qeverisjen, transparencën dhe mungesën e konsultimeve domethënëse”, thuhet më tej.

Federata tha se sfidat e saj të fundit në fushën e qeverisjes i japin “një detyrim të veçantë për të promovuar dhe respektuar praktikat më të mira”.

Në Irlandën e Veriut, Federata Irlandeze e Futbollit (IFA) shprehu mbështetje për qëndrimin e UEFA-s, por nuk shkoi deri në tërheqjen zyrtare të mbështetjes për Infantinon.

“Ne i marrim seriozisht përgjegjësitë tona si federatë anëtare e UEFA-s dhe FIFA-s”, tha një zëdhënës i IFA-së.

“Ne mbështesim qëndrimin aktual të UEFA-s për këtë çështje dhe do të vazhdojmë të angazhohemi në mënyrë konstruktive për çështjet që lidhen me qeverisjen e futbollit”, shtoi ai.

Infantino vazhdon të përballet me kritika në rritje lidhur me planin e tij për të sjellë investime private në garat e FIFA-s, përfshirë Kupën e Botës, pavarësisht se e ka braktisur këtë propozim.

UEFA, Konfederata Aziatike e Futbollit (AFC) dhe Konfederata e Futbollit të Amerikës së Veriut, Qendrore dhe Karaibeve (CONCACAF) e kanë akuzuar FIFA-n për “mashtrim” dhe “shkelje thelbësore të besimit” lidhur me mënyrën se si e trajtoi planin.

Infantino, i cili raportohet se synon rizgjedhjen në mars 2027, vazhdon të ketë mbështetjen e disa federatave kombëtare, përfshirë ato të Argjentinës dhe Meksikës, si dhe Konfederatës Afrikane të Futbollit (CAF).