Presidenti i ShBA-së, Donald Trump, ka urdhëruar një bllokadë detare amerikane në Ngushticën e Hormuzit, në përgjigje të asaj që ai e quajti refuzim “të palëkundur” të Iranit për të hequr dorë nga ambiciet e tij bërthamore gjatë bisedimeve të paqes në Islamabad.

“Bllokada do të fillojë së shpejti. Vende të tjera do të përfshihen në këtë bllokadë. Iranit nuk do t’i lejohet të përfitojë nga ky akt i paligjshëm zhvatjeje”, tha Trump në platformën e tij Truth Social të dielën.

Duke pranuar se bisedimet maratonë në Pakistan kishin shkuar “mirë” dhe se “shumica e pikave ishin dakorduar”, Trump tha se Teherani kishte refuzuar të lëshonte në çështjen e programit të tij bërthamor.

“Menjëherë në fuqi, Marina e Shteteve të Bashkuara, më e mira në botë, do të nisë procesin e bllokimit të çdo anijeje që përpiqet të hyjë ose të dalë nga Ngushtica e Hormuzit”, tha Trump.

Ai shtoi se ka udhëzuar Marinën të ndalojë çdo anije në ujërat ndërkombëtare që ka paguar tarifë ndaj Iranit për kalimin nëpër Ngushticën e Hormuzit.

Trump tha gjithashtu se forcat amerikane do të fillojnë shkatërrimin e minave iraniane në këtë rrugë ujore strategjike, duke paralajmëruar se çdo iranian që hap zjarr ndaj anijeve amerikane ose tregtare “do të shkatërrohet plotësisht”.

Irani dhe Shtetet e Bashkuara nuk arritën të sigurojnë një marrëveshje në Islamabad, por nuk pati një rikthim të menjëhershëm të armiqësive, ndërsa liderët botërorë u bënë thirrje të dyja palëve të ndjekin rrugën diplomatike drejt paqes.

Zëvendëspresidenti i ShBA-së, JD Vance, u largua nga Pakistani pas bisedimeve dhe paralajmëroi se Uashingtoni i kishte paraqitur Teheranit “ofertën e tij përfundimtare dhe më të mirë” për një marrëveshje.

“Ne largohemi nga këtu me një propozim shumë të thjeshtë”, tha ai. “Do të shohim nëse iranianët e pranojnë”.

Kryetari i parlamentit iranian, Mohammad Bagher Ghalibaf, tha se ekipi i tij negociues kishte “paraqitur iniciativa konstruktive, por në fund pala tjetër nuk arriti të fitojë besimin e delegacionit iranian në këtë raund negociatash”.

Raportimet iraniane dhe amerikane thanë se të dyja palët nuk arritën të bien dakord se kush do ta kontrollojë Ngushticën e Hormuzit, si dhe nëse Teherani do të ketë të drejtën të pasurojë uraniumin në kuadër të ndonjë marrëveshjeje.