Sekretari i Përgjithshëm i Organizatës për Bashkëpunim Ekonomik D-8, ambasadori Sohail Mahmood, tha për Anadolu se vende anëtare si Pakistani, Türkiye dhe Egjipti kanë qenë të angazhuara aktivisht në përpjekjet për ndërmjetësim për të parandaluar përshkallëzimin e mëtejshëm të luftës me Iranin, për të mbështetur një armëpushim dhe për të promovuar një zgjidhje diplomatike të qëndrueshme.
Në deklarata me shkrim, ai tha se të gjitha palët kanë një detyrë dhe përgjegjësi historike në bisedimet e planifikuara për armëpushim mes ShBA-së dhe Iranit në Pakistan.
Ai shtoi se javë të tëra diplomacie prapa skenave kanë ndihmuar në krijimin e një mundësie kritike për t’u tërhequr nga përshkallëzimi.
Mahmood theksoi se bisedimet në Islamabad duhet të jenë produktive dhe të çojnë drejt një paqeje të qëndrueshme.
Ai paralajmëroi se rreziqet mbeten shumë të larta, veçanërisht për tregjet globale të energjisë dhe ekonomitë që varen nga furnizimi i qëndrueshëm me naftë nga Gjiri.
Megjithatë, ai tha se mundësia për një përparim është po aq e rëndësishme dhe shprehu shpresën se të gjitha palët do të veprojnë me përgjegjësi dhe seriozitet për ta bërë të suksesshme procesin e negociatave.
