Njëmbëdhjetë anije në pronësi turke kanë kaluar në mënyrë të sigurt nëpër Ngushticën e Hormuzit dhe kanë lënë Gjirin që nga fillimi i luftës, tha të martën ministri turk i transportit dhe infrastrukturës Abdülkadir Uraloğlu.
Ministri Uraloğlu deklaroi në platformën turke të mediave sociale NSosyal se Ankaraja po monitoron zhvillimet në Ngushticën e Hormuzit dhe në Gjir "çast pas çasti" dhe mbetet në kontakt të vazhdueshëm me anijet dhe shtetasit turq në rajon.
Me largimin e dy anijeve të tjera në mëngjesin e 21 qershorit, numri i anijeve në pronësi turke që kanë dalë në mënyrë të sigurt nga Gjiri nëpër Ngushticën e Hormuzit që nga fillimi i luftës arriti në 11, shtoi ai.
Gjithsej shtatë anije ndodhen ende në zonën e Ngushticës së Hormuzit dhe të Gjirit, me 177 shtetas turq që shërbejnë në bord, theksoi Uraloglu. Një nga anijet lundron nën flamurin turk.
Ministri nënvizoi se Türkiye do të vazhdojë të marrë të gjitha masat e nevojshme në çdo rrethanë për të garantuar sigurinë e shtetasve dhe anijeve të saj.
Në prill, Uraloğlu kishte njoftuar se anija cisternë turke Ocean Thunder, që transportonte naftë bruto nga Iraku drejt Malajzisë, kaloi në mënyrë të sigurt nëpër ngushticë me mbështetjen e Ministrisë së Jashtme turke.
Rajoni kishte qenë në gjendje alarmi që nga data 28 shkurt, kur ShBA-ja dhe Izraeli nisën një ofensivë të përbashkët kundër Iranit, duke vrarë mbi 3.000 persona deri më sot, përfshirë Udhëheqësin Suprem të atëhershëm, Ayatollah Ali Khamenei.
Irani iu përgjigj me sulme me dronë dhe raketa ndaj Izraelit, Irakut dhe vendeve të Gjirit që strehojnë baza ushtarake amerikane, duke kufizuar gjithashtu lëvizjen e anijeve nëpër Ngushticën e Hormuzit.
Ngushtica e Hormuzit është një nga pikat më të rëndësishme të transportit detar në botë, që lidh Gjirin me Gjirin e Omanit dhe rrugët globale të transportit të energjisë.
